128:1 (canticum graduum) saepe expugnaverunt me a iuventute mea dicat nunc Israel
128:2 saepe expugnaverunt me a iuventute mea etenim non potuerunt mihi
128:3 supra dorsum meum fabricabantur peccatores prolongaverunt iniquitatem suam
128:4 Dominus iustus concidet cervices peccatorum
128:5 confundantur et convertantur retrorsum omnes qui oderunt Sion
128:6 fiant sicut faenum tectorum quod priusquam evellatur exaruit
128:7 de quo non implevit manum suam qui metit et sinum suum qui manipulos colligit
128:8 et non dixerunt qui praeteribant benedictio Domini super vos benediximus vobis in nomine Domini