Prídie Nonas Januárii
_
Octáva sanctórum Innocéntium Mártyrum. 
In Creta natális sancti Titi, qui, ab Apóstolo Paulo Epíscopus Creténsium ordinátus, et, post prædicatiónis offícium fidelíssime consummátum, finem beátum adéptus, in ea sepúltus est Ecclésia, ubi a beáto Apóstolo dignus miníster fúerat constitútus. Ipsíus tamen festívitas octávo Idus Februárii celebrátur.
Romæ sanctórum Mártyrum Prisci Presbýteri, et Priscilliáni Clérici, ac Benedíctæ, religiósæ féminæ; qui, témpore impiíssimi Juliáni, gládio martýrium complevérunt.
Item Romæ beátæ Dafrósæ, uxóris sancti Flaviáni Mártyris, ac matris sanctárum Bibiánæ et Demétriæ, Vírginum et Mártyrum; quæ, post interfectiónem viri sui, primum exsílio relegáta, deínde, sub præfáto Príncipe, cápite plexa est.
Bonóniæ sanctórum Hermétis, Aggæi et Caji Mártyrum, qui sub Maximiáno Imperatóre passi sunt.
Adruméti, in Africa, commemorátio sancti Mávili Mártyris, qui in persecutióne Sevéri Imperatóris, a sævíssimo Prǽside Scápula damnátus ad béstias, martýrii corónam accépit.
Item in Africa præclarissimórum Mártyrum Aquilíni, Gémini, Eugénii, Marciáni, Quincti, Theodóti et Tryphónis.
Apud Língonas, in Gállia, sancti Gregórii Epíscopi, miráculis clari.
Rhemis, in Gállia, sancti Rigobérti, Epíscopi et Confessóris.