Undécimo Kaléndas Februárii
_
Valéntiæ, in Hispánia Tarraconénsi, sancti Vincéntii, Levítæ et Mártyris; qui, sub impiíssimo Prǽside Daciáno, cárceres, famem, equúleum, distorsiónes membrórum, láminas candéntes, férream cratem ignítam áliaque tormentórum génera perpéssus, ad martýrii prǽmium evolávit in cælum; cujus passiónis nóbilem triúmphum Prudéntius luculénter vérsibus exséquitur, et beátus Augustínus ac sanctus Leo Papa summis láudibus comméndant.
Apud Bethsáloën, in Assýria, sancti Anastásii Persæ Mónachi, qui, post plúrima torménta cárceris, vérberum et vinculórum, quæ in Cæsaréa Palæstínæ perpéssus fúerat, a Persárum Rege Chósroa multis pœnis afféctus, ad últimum decollátus est, cum prius septuagínta Sócios, qui fúerant in fluénta demérsi, ad martýrium præmisísset. Ejus caput Romam, ad Aquas Sálvias, delátum est, una cum veneránda ejus imágine, cujus aspéctu fugári dǽmones morbósque curári, Acta secúndi Concílii Nicǽni testántur.
Ebredúni, in Gálliis, sanctórum Mártyrum Vincéntii, Oróntii et Victóris, qui martýrio in Diocletiáni persecutióne coronáti sunt.
Nováriæ sancti Gaudéntii, Epíscopi et Confessóris.
Soræ sancti Domínici Abbátis, miráculis clari.