Tértio Nonas Februárii
_
Sebáste, in Arménia, pássio sancti Blásii, Epíscopi et Mártyris; qui, multórum patrátor miraculórum, sub Agricoláo Prǽside, post diútinam cæsiónem, atque in ligno suspensiónem, ubi férreis pectínibus carnes ejus dirúptæ sunt, post tetérrimum cárcerem et in lacum demérsionem, unde salvus exívit, tandem, jubénte eódem Júdice, una cum duóbus púeris, cápite truncátur. Ante ipsum vero septem mulíeres, quæ guttas sánguinis, ex ejúsdem Mártyris córpore defluéntes, dum torquerétur, colligébant, proptérea, deprehénsæ quod essent Christiánæ, omnes, post dira torménta, gládio percússæ sunt.
In Africa sancti Celeríni Diáconi, qui, decem et novem dies custódia cárceris septus, in nervo et ferro variísque pœnis gloriósus fuit Christi Conféssor; et, dum inexpugnábili firmitáte certáminis sui vicit adversárium, vincéndi céteris viam fecit.
Ibídem sanctórum trium Mártyrum, ipsíus Celeríni Diáconi consanguineórum, scílicet Laurentíni pátrui, Ignátii avúnculi, et Celérinæ áviæ, qui ántea martýrio coronáti fúerant; de quorum ómnium gloriósis láudibus exstat beáti Cypriáni epístola.
Item in Africa sanctórum Mártyrum Felícis, Symphrónii, Hippólyti et Sociórum.
In óppido Vapíngo, in Gállia, sanctórum Tigídis et Remédii Episcopórum.
Lugdúni, in Gállia, sanctórum Lupicíni et Felícis, itidem Episcopórum.
Bremæ sancti Anschárii, Hamburgénsis ac póstea Breménsis simul Epíscopi, qui Suévos et Danos ad Christi fidem convértit, et a Gregório Papa Quarto Legátus Apostólicus totíus Septentriónis fuit institútus.