Prídie Nonas Februárii
_
Sancti Andréæ Corsíni, ex Ordine Carmelitárum, Epíscopi Fæsuláni et Confessóris, cujus dies natális ágitur octávo Idus Januárii.
Romæ sancti Eutýchii Mártyris, qui illústre martýrium consummávit, ac sepúltus est in cœmetério Callísti; ejúsque sepúlcrum póstea sanctus Dámasus Papa vérsibus exornávit.
Thmui, in Ægýpto, pássio beáti Philéæ, ejúsdem civitátis Epíscopi, et Philóromi, Tribúni mílitum; qui, in persecutióne Diocletiáni, cum a cognátis et amícis suadéri non possent ut sibi párcerent, ambo, datis cervícibus, palmas a Dómino meruérunt. Cum ipsis innúmera étiam multitúdo fidélium ex eádem urbe, pastóris sui vestígia sequens, martýrio coronáta est.
Foro Semprónii sanctórum Mártyrum Aquilíni, Gémini, Gelásii, Magni et Donáti.
In regno Maravénsi, apud Indos Orientáles, sancti Joánnis de Britto, Sacerdótis e Societáte Jesu, qui, cum multos infidéles ad fidem convertísset, glorióso martýrio coronátus est.
Trecis, in Gállia, sancti Aventíni, Presbýteri et Confessóris.
Pelúsii, in Ægýpto, sancti Isidóri, Presbýteri et Mónachi, méritis et doctrína conspícui.
Sempringhámiæ, in Anglia, sancti Gilbérti, Presbýteri et Confessóris, qui Ordinis Sempringhamiénsis fuit Institútor.
In óppido Amatrícis, in Aprútio, deposítio sancti Joséphi a Leoníssa, Sacerdótis ex Ordine Minórum Capuccinórum et Confessóris; quem, ob fídei prædicatiónem a Mahumetánis dira perpéssum, labóribus apostólicis et miráculis clarum, Benedíctus Décimus quartus, Póntifex Máximus, in Sanctórum cánonem rétulit.
Bremæ commemorátio sancti Rembérti, qui, sancti Anschárii discípulus, in ipsíus locum, hac die, óbitum magístri sui próxime subsequenti, olim Hamburgénsis simul ac Breménsis Epíscopus eléctus est.
Bitúricis, in Aquitánia, sanctæ Joánnæ de Valois, Gálliæ Regínæ, Ordinis sanctíssimæ Annuntiatiónis beátæ Maríæ Vírginis Fundatrícis, pietáte et singulári Crucis participatióne illústris, a Pio Papa Duodécimo Sanctárum fastis adscríptæ.