Sexto Idus Februárii
_
Sancti Joánnis de Matha, Presbýteri et Confessóris, qui Ordinis sanctíssimæ Trinitátis redemptiónis captivórum fuit Institútor, et sextodécimo Kaléndas Januárii obdormívit in Dómino.
Somáschæ, in território Bergoménsi, natális sancti Hierónymi Æmiliáni Confessóris, qui Congregatiónis Somáschæ Fundátor éxstitit; atque, plúribus in vita et post mortem miráculis illústris, a Cleménte Décimo tértio, Pontífice Máximo, Sanctórum fastis adscríptus est, et a Pio Papa Undécimo universális orphanórum ac derelíctæ juventútis Patrónus apud Deum eléctus et declarátus. Ejus tamen festívitas tertiodécimo Kaléndas Augústi recólitur.
Romæ sanctórum Mártyrum Pauli, Lúcii et Cyríaci.
In Arménia minóre pássio sanctórum Mártyrum Dionýsii, Æmiliáni et Sebastiáni.
Constantinópoli natális sanctórum Mártyrum Monachórum monastérii Dii, qui, ob defensiónem fídei cathólicæ, cum tulíssent lítteras sancti Felícis Papæ Tértii advérsus Acácium, diríssime cæsi sunt.
In Pérside commemorátio sanctórum Mártyrum, qui, sub Rege Persárum Cábade, ob Christiánam fidem, divérsis supplíciis necáti sunt.
Alexandríæ pássio sanctæ Coínthæ Mártyris, quam Pagáni, sub Décio Imperatóre, corréptam et ad idóla perdúctam, hæc adoráre cogébant; quod cum illa éxsecrans recusáret, ipsíus pedes vínculis innexuérunt, eámque, trahéntes sic vinctam per civitátis platéas, horréndo supplício discerpsérunt.
Pápiæ sancti Juvéntii Epíscopi, qui strénue in Evangélio laborávit.
Medioláni deposítio sancti Honoráti, Epíscopi et Confessóris.
Virodúni, in Gállia, sancti Pauli Epíscopi, miraculórum dono illústris.
Apud Murétum, in agro Lemovicénsi, natális sancti Stéphani Abbátis, qui Grandimonténsis Ordinis Institútor fuit, ac virtútibus et miráculis cláruit.
In monastério Vallis Umbrósæ Beáti Petri, Cardinális et Epíscopi Albanénsis, ex Ordine Vallis Umbrósæ, cognoménto Ignei, quia per ignem illǽsus transívit.