Nono Kaléndas Mártii
_
Scythópoli, in Palæstína, sancti Severiáni, Epíscopi et Mártyris, qui, Eutychiánis acérrime se oppónens, gládio perémptus est. 
In Sicília natális sanctórum Mártyrum septuagínta novem, qui sub Diocletiáno, per divérsa torménta, confessiónis suæ corónam percípere meruérunt.
Adruméti, in Africa, sanctórum Mártyrum Véruli, Secundíni, Sirícii, Felícis, Sérvuli, Saturníni, Fortunáti et aliórum séxdecim, qui in persecutióne Wandálica, ob cathólicæ fídei confessiónem, martýrio coronáti sunt.
Damásci sancti Petri Maviméni, qui, cum díceret Arábibus quibúsdam, ad se ægrótum veniéntibus: «Omnis qui fidem Christiánam cathólicam non ampléctitur, damnátus est, sicut et Máhumet, pseudoprophéta vester,» ab illis est necátus.
Metis, in Gállia, sancti Felícis Epíscopi.
Bríxiæ sancti Patérii Epíscopi.