Séptimo Kaléndas Mártii
_
/:In anno Bissextili omittitur: Vigília sancti Matthíæ Apóstoli; quia transfertur in sequentem diem, quæ est 24.:/
Vigília sancti Matthíæ Apóstoli.
Sancti Petri Damiáni, ex Ordine Camaldulénsi, Cardinális et Epíscopi Ostiénsis, Confessóris et Ecclésiæ Doctóris, qui evolávit in cælum prídie hujus diéi.
Smyrnæ natális sancti Polycárpi, qui, beáti Joánnis Apóstoli discípulus, et ab eo ejúsdem civitátis Epíscopus ordinátus, totíus Asiæ Princeps fuit. Póstea, sub Marco Antoníno et Lúcio Aurélio Cómmodo, sedénte Procónsule et univérso pópulo in theátro advérsus eum personánte, igni tráditus est; et, cum ab igne mínime læderétur, martýrii corónam, gládio confóssus, accépit. Cum illo étiam álii duódecim, qui ex Philadélphia vénerant, in eádem Smyrnénsi urbe, martýrio consummáti sunt. Ipsíus tamen Polycárpi festum séptimo Kaléndas Februárii celebrátur.
Apud Sírmium beáti Siréni, Mónachi et Mártyris, qui, jubénte Maximiáno Imperatóre, reténtus est, et, cum se Christiánum esse confiterétur, cápite obtruncátus.
Ibídem natális sanctórum septuagínta duórum Mártyrum, qui, martýrii certámen in præfáta urbe consummántes, mansúra percepérunt regna.
In civitáte Asturicénsi, in Hispánia, sanctæ Marthæ, Vírginis et Mártyris, quæ, sub Décio Imperatóre et Patérno Procónsule, dire ob Christi fidem est cruciáta et gládio tandem occísa.
Constantinópoli sancti Lázari Mónachi, qui, cum sacras Imágines píngeret, idcírco, Imperatóris Iconoclástæ Theóphili jussu, diris supplíciis excruciátur, et ei manus candénti ferro combúritur; sed, Dei virtúte sanátus, abrásas Imágines sanctas pingéndo restítuit, ac demum in pace quiévit.
Bríxiæ sancti Felícis Epíscopi.
Romæ sancti Polycárpi Presbýteri, qui, cum beáto Sebastiáno, plúrimos ad Christi fidem convértit, atque ad martýrii glóriam exhortándo perdúxit.
Híspali, in Hispánia, sancti Floréntii Confessóris.
Tudérti, in Umbria, sanctæ Románæ Vírginis, quæ, a sancto Silvéstro Papa baptizáta, in antris et spelúncis cæléstem vitam duxit, et miraculórum glória cláruit.
In Anglia sanctæ Milbúrgis Vírginis, fíliæ Regis Merciórum.
/:In anno Bissextili bis pronuntiatur Sexto Kaléndas Mártii, et eadem Luna, scilicet die 24 et 25.:/
/:Prima die, id est 24, hoc modo: Sexto Kaléndas Mártii. Luna..., quota fuerit.  Deinde: Vigília sancti Matthíæ Apóstoli. Item commemorátio plurimórum sanctórum Mártyrum et Confessórum, atque sanctárum Vírginum. :/
/:Secunda die, id est 25: Sexto Kaléndas Mártii. Luna... In Judǽa..., et cetera, ut in sequenti Lectione.:/