Prídie Nonas Mártii
_
Sanctárum Perpétuæ et Felicitátis Mártyrum, quæ sequénti die gloriósam martýrii corónam a Dómino recepérunt.
Dertónæ sancti Marciáni, Epíscopi et Mártyris, qui, sub Trajáno, pro Christi glória occísus, coronátur.
Nicomedíæ natális sanctórum Mártyrum Victóris et Victoríni, qui, per triénnium, cum Claudiáno et uxóre ejus Bassa, torméntis multis afflícti et retrúsi in cárcerem, ibídem vitæ suæ cursum implevérunt.
In Cypro sancti Conónis Mártyris, qui, sub Décio Imperatóre, clavis confíxus pedes et ante currum jussus cúrrere, in génua procúbuit, atque in oratióne réddidit spíritum.
In Sýria pássio sanctórum quadragínta duórum Mártyrum, qui, in Amório comprehénsi et illuc perdúcti, ibi, egrégio perácto certámine, victóres palmam martýrii percepérunt.
Constantinópoli sancti Evágrii, qui, témpore Valéntis a Cathólicis eléctus Epíscopus, et ab eódem Imperatóre in exsílium missus, Conféssor migrávit ad Dóminum.
Bonóniæ sancti Basilíi Epíscopi, qui, a sancto Silvéstro Papa ordinátus, verbo et exémplo créditam sibi Ecclésiam sanctíssime gubernávit.
Barcinóne, in Hispánia, beáti Ollegárii, primum Canónici, et póstea Epíscopi Barcinonénsis, et Archiepíscopi Tarraconénsis.
Vitérbii beátæ Rosæ Vírginis, ex tértio Ordine sancti Francísci.
Apud Gandávum, in Flándria, sanctæ Colétæ Vírginis, quæ, primum tértii Ordinis Franciscális régulam proféssa, deínde, divíno Spíritu affláta, quamplúra Moniálium secúndi ejúsdem Ordinis monastéria primǽvæ restítuit disciplínæ; atque, divínis exornáta virtútibus et innúmeris clara miráculis, a Pio Séptimo, Pontífice Máximo, in albo Sanctórum adscrípta est.