Quinto Kaléndas Aprílis
_
Sancti Joánnis de Capistráno, Sacerdótis ex Ordine Minórum et Confessóris, cujus memória recólitur décimo Kaléndas Novémbris.
Cæsaréæ, in Palæstína, natális sanctórum Mártyrum Prisci, Malchi et Alexándri. Hi tres, in persecutióne Valeriáni, cum in suburbáno agéllo supradíctæ urbis habitárent, atque in ea cæléstes martýrii proponeréntur corónæ, ultro Júdicem, divíno fídei calóre succénsi, ádeunt, et cur tantum in sánguinem piórum desævíret, objúrgant; quos ille contínuo, pro Christi nómine, béstiis trádidit devorándos.
Tarsi, in Cilícia, sanctórum Mártyrum Castóris et Doróthei.
In Africa sanctórum Mártyrum Rogáti, Succéssi et aliórum séxdecim.
Apud Núrsiam sancti Spei Abbátis, miræ patiéntiæ viri, cujus ánima (ut refert sanctus Gregórius Papa), cum ex hac vita migráret, in colúmbæ spécie a cunctis frátribus visa est in cælum ascéndere.
Cabillóne, in Gálliis, deposítio sancti Gunthrámni, Regis Francórum, qui spiritálibus actiónibus ita se mancipávit, ut, relíctis sǽculi pompis, thesáuros suos lárgiter Ecclésiis et paupéribus erogáret.