Quinto Idus Aprílis
_
In Judǽa sanctæ Maríæ Cléophæ, quam beátus Joánnes Evangelísta sorórem sanctíssimæ Dei Genitrícis Maríæ núncupat, et cum hac simul juxta crucem Jesu stetísse narrat.
Antiochíæ sancti Próchori, qui fuit unus de septem primis Diáconis; et, fide ac miráculis clarus, martýrio coronátus est.
Romæ natális sanctórum Mártyrum Demétrii, Concéssi, Hilárii et Sociórum.
Cæsaréæ, in Cappadócia, sancti Eupsýchii Mártyris, qui ob evérsum Fortúnæ fanum, sub Juliáno Apóstata, martýrium consummávit.
In Africa sanctórum Mártyrum Massylitanórum, in quorum die natáli sanctus Augustínus tractátum hábuit.
Sírmii pássio sanctárum septem Vírginum et Mártyrum, quæ, dato simul prétio sánguinis, vitam mercátæ sunt ætérnam.
Amidæ, in Mesopotámia, sancti Acátii Epíscopi, qui pro rediméndis captívis étiam vasa Ecclésiæ conflávit ac véndidit.
Rotómagi sancti Hugónis, Epíscopi et Confessóris.
In civitáte Diénsi, in Gállia, sancti Marcélli Epíscopi, miráculis clari.
Móntibus, in Hannónia, beátæ Waldetrúdis, vitæ sanctimónia et miráculis claræ.
Romæ Translátio córporis sanctæ Mónicæ, matris beáti Augustíni Epíscopi; quod, ex Ostiis Tiberínis, Martíno Quinto Summo Pontífice, in Urbem delátum, in Ecclésia ejúsdem beáti Augustíni honorífice recónditum fuit.