Prídie Kaléndas Maji
_
Sanctæ Catharínæ Senénsis Vírginis, ex tértio Ordine sancti Domínici, quæ ad cæléstem Sponsum transívit prídie hujus diéi.
Apud Sántonas, in Gállia, beáti Eutrópii, Epíscopi et Mártyris, qui, a sancto Cleménte Papa, ordinis pontificális grátia consecrátus, in Gálliam diréctus est, ibíque, perácta diu prædicatióne, tandem, ob Christi testimónium, collíso cápite, victor occúbuit.
Córdubæ, in Hispánia, sanctórum Mártyrum Amatóris Presbýteri, Petri Mónachi, et Ludovíci.
Nováriæ sancti Lauréntii Presbýteri, et puerórum Mártyrum, quos ille suscéperat educándos.
Alexandríæ sanctórum Mártyrum Aphrodísii Presbýteri, et aliórum trigínta.
Lambésæ, in Numídia, natális sanctórum Mártyrum Mariáni Lectóris, et Jacóbi Diáconi. Horum prior, cum infestatiónes jamprídem Deciánæ persecutiónis in confessióne Christi vicísset, íterum cum claríssimo colléga tentus est; et ambo, post dira et exquisíta supplícia, mirabíliter divínis revelatiónibus secúndo confortáti, novíssime, cum multis áliis, gládio consummáti sunt.
Ephesi sancti Máximi Mártyris, qui in persecutióne Décii coronátus est.
Firmi, in Picéno, sanctæ Sophíæ, Vírginis et Mártyris.
Evóreæ, in Epíro, sancti Donáti Epíscopi, qui, témpore Theodósii Imperatóris, exímia sanctitáte refúlsit.
Neápoli, in Campánia, sancti Pompónii Epíscopi.
Londíni, in Anglia, sancti Erconváldi Epíscopi, qui multis miráculis cláruit.
Chérii, apud Augústam Taurinórum, sancti Joséphi Benedícti Cottoléngo, Confessóris, Parvæ Domus a Divína Providéntia Fundatóris, summa in Deum confidéntia et caritáte in páuperes insígnis, quem Pius Papa Undécimus Sanctórum fastis adscrípsit.