Nonas Maji
_
Sancti Stanislái, Epíscopi Cracoviénsis et Mártyris, qui sequénti die corónam martýrii consecútus est.
Tarracínæ, in Campánia, natális beátæ Fláviæ Domitíllæ, Vírginis et Mártyris; quæ, cum esset fília sanctæ Plautíllæ, soróris sancti Mártyris Flávii Cleméntis Cónsulis, et sacro velámine fuísset a sancto Cleménte Pontífice consecráta, primum, in persecutióne Domitiáni, ob testimónium Christi, in ínsulam Póntiam, cum áliis plúrimis, exsílio deportáta, longum illic martýrium duxit. Novíssime vero, Tarracínam dedúcta, ibi, cum plúrimos doctrína et miráculis ad Christi fidem convertísset, Júdicis jussu incénso cubículo, in quo simul cum suis virgínibus Euphrósyna et Theodóra morabátur, cursum gloriósi martýrii consummávit. Ipsa vero Domitílla, una cum sanctis Martýribus Néreo et Achílleo atque Pancrátio, féstiva celebritáte quarto Idus mensis hujus recólitur.
Eódem die sancti Juvenális Mártyris.
Nicomedíæ sanctórum Mártyrum fratrum Flávii, Augústi et Augustíni.
Ibídem sancti Quadráti Mártyris, qui, in persecutióne Décii Imperatóris, sǽpius ad torménta repetítus, demum, cápite truncátus, martýrium complévit.
Eboráci, in Anglia, sancti Joánnis Epíscopi, vita et miráculis clari.
Pápiæ sancti Petri Epíscopi.
Romæ Translátio córporis sancti Stéphani Protomártyris, quod, Pelágio Primo Summo Pontífice, e Constantinópoli ad Urbem allátum atque in sepúlcro sancti Lauréntii Mártyris in agro Veráno pósitum, ibídem magna piórum religióne cólitur.