Octávo Kaléndas Júnii
_
Salérni deposítio beáti Gregórii Séptimi, Papæ et Confessóris, ecclesiásticæ libertátis propugnatóris ac defensóris acerrimi.
Romæ, via Nomentána, natális beáti Urbáni Primi, Papæ et Mártyris, cujus exhortatióne et doctrína complúres (in quibus fuére Tibúrtius et Valeriánus) Christi suscepérunt fidem, et pro ea martýrium subiérunt. Ipse quoque, in persecutióne Alexándri Sevéri, multa passus pro Ecclésia Dei, tandem, cervícibus abscíssis, martýrio coronátus est.
Girvi, in Anglia, tránsitus sancti Bedæ Venerábilis, Presbýteri, Confessóris et Ecclésiæ Doctóris, sanctitáte et eruditióne celebérrimi. Ipsíus autem festum recólitur sexto Kaléndas Júnii.
Floréntiæ natális sanctæ Maríæ-Magdalénæ de Pazzis Vírginis, ex Ordine Carmelitárum, vita et sanctitáte illústris. Ejus vero festívitas quarto Kaléndas Júnii celebrátur.
Doróstori, in Mýsia inferióre, item natális sanctórum Mártyrum Pasícratis, Valentiónis et aliórum duórum, simul coronatórum.
Medioláni sancti Dionýsii Epíscopi, qui, ab Ariáno Imperatóre Constántio in Cappadóciam pro fide cathólica relegátus, ibídem, propióre Martýribus título, spíritum Deo réddidit. Ejus sacrum corpus ab Aurélio Epíscopo transmíssum est Mediolánum ad beátum Ambrósium Epíscopum; cui piæ actióni offícium quoque sancti Basilíi Magni accessísse tráditur.
Floréntiæ natális sancti Zenóbii, ejúsdem civitátis Epíscopi, vitæ sanctitáte ac miraculórum glória conspícui.
In Británnia sancti Aldélmi, Epíscopi Schireburgénsis.
In território Tricassíno sancti Leónis Confessóris.
Lutétiæ Parisiórum sanctæ Magdalénæ-Sophíæ Barat, Fundatrícis Institúti Sorórum a Sacro Corde Jesu; quæ pro Christiána puellárum informatióne valde adlaborávit, et a Pio Papa Undécimo in sanctárum Vírginum catalógum fuit reláta.
Vérulis, in Hérnicis, Translátio sanctæ Maríæ Jacóbi; cujus sacrum corpus plúrimis miráculis illustrátur.
Assísii, in Umbria, item Translátio sancti Francísci Confessóris, témpore Gregórii Papæ Noni.