Quinto Kaléndas Júnii
_
Sancti Augustíni, Epíscopi Cantuariénsis et Confessóris, cujus dies natális ágitur séptimo Kaléndas Júnii. 
In Sardínia sanctórum Mártyrum Æmílii, Felícis, Príami et Luciáni, qui, pro Christo certántes, ab eo glorióse coronáti sunt.
Carnóti, in Gállia, sancti Caráuni Mártyris, qui sub Domitiáno Imperatóre, cápite amputátus, martýrium sumpsit.
Item pássio sanctórum Crescéntis, Dioscóridis, Pauli et Helládii.
Thécuæ, in Palæstína, sanctórum Monachórum Mártyrum, qui, témpore Theodósii junióris, a Saracénis occísi sunt, quorum sacras relíquias collegérunt áccolæ, et summa veneratióne illas habuérunt.
Corínthi sanctæ Helicónidis Mártyris, témpore Gordiáni Imperatóris. Hæc primum, sub Perénnio Prǽside, multis torméntis afflícta; deínde, sub ejus successóre Justíno, íterum cruciáta, sed ab Angelis liberáta est; demum, disséctis mammis, ferísque objécta atque igne probáta, cápitis obtruncatióne martýrium complévit.
Lutétiæ Parisiórum sancti Germáni, Epíscopi et Confessóris; qui quantæ sanctitátis quantíque fúerit mériti, quibus étiam miráculis clarúerit, litterárum moniméntis Fortunátus Epíscopus consignávit.
Medioláni sancti Senatóris Epíscopi, virtútibus et eruditióne claríssimi.
Urgéllæ, in Hispánia Tarraconénsi, sancti Justi Epíscopi.
Floréntiæ sancti Pódii, Epíscopi et Confessóris.
Apud Nováriam sancti Bernárdi a Menthóne Confessóris, qui in monte Jovis, super Alpes, in Valésia, celebérrimum cœnóbium et hospítium exstrúxit, atque a Pio Papa Undécimo, non modo Alpium íncolis vel viatóribus, sed iis étiam qui eárum juga ascendéndo se exércent, cæléstis Patrónus est attribútus.