Tértio Nonas Júnii
_
Arétii, in Túscia, sanctórum Mártyrum Pergentíni et Laurentíni fratrum, qui, in persecutióne Décii, sub Tibúrtio Prǽside, cum essent púeri, ibídem, post dira supplícia toleráta et magna mirácula osténsa, gládio cæsi sunt.
Constantinópoli sanctórum Mártyrum Lucilliáni et quátuor puerórum, scílicet Cláudii, Hypátii, Pauli et Dionýsii. His cum púeris Lucilliánus, ex idolórum sacerdóte Christiánus factus, in fornácem, post vária torménta, injéctus est, sed, flamma imbre exstíncta, omnes illǽsi evasérunt; dénique, ipse cruci affíxus, púeri autem gládio obtruncáti, sub Silváno Prǽside, consummáti sunt.
Córdubæ, in Hispánia, beáti Isaac Mónachi, qui, pro Christi fide, gládio necátus est.
Constantinópoli sanctæ Paulæ, Vírginis et Mártyris, quæ, cum prædictórum Mártyrum Lucilliáni ac Sociórum sánguinem collígeret, ídeo, comprehénsa, virgis percússa, et in ignem conjécta sed liberáta, demum et ipsa eódem loco, ubi sanctus Lucilliánus crucifíxus fúerat, decolláta est.
Carthágine sancti Cæcílii Presbýteri, qui sanctum Cypriánum ad Christi fidem perdúxit. 
In território Aurelianénsi sancti Liphárdi, Presbýteri et Confessóris.
Lucæ, in Túscia, sancti Davíni Confessóris.
Anániæ sanctæ Olívæ Vírginis.
Lutétiæ Parisiórum sanctæ Clotíldis Regínæ, cujus précibus vir ejus Clodovéus, Rex Francórum, Christi fidem suscépit.