Quarto Idus Júnii
_
Sanctæ Margarítæ Víduæ, Scotórum Regínæ, quæ sextodécimo Kaléndas Decémbris obdormívit in Dómino.
Romæ, via Salária, pássio beáti Getúlii, claríssimi et doctíssimi viri, ac susceptórum e sancta uxóre Symphorósa beatórum septem fratrum Mártyrum patris, ejúsque Sociórum Cæreális, Amántii et Primitívi. Hi omnes, Hadriáni Imperatóris jussu, a Licínio Consulári tenti, primum cæsi sunt, deínde in cárcerem trusi; postrémum, incéndio tráditi, sed nullo modo ab igne læsi, martýrium suum, fústibus illiso cápite, complevérunt. Ipsórum autem córpora Symphorósa, beáti Getúlii uxor, collégit, et in arenário prǽdii sui honorífice sepelívit.
Item Romæ, via Aurélia, natális sanctórum Basílidis, Trípodis, Mándalis et aliórum vigínti Mártyrum, sub Imperatóre Aureliáno et Urbis Præfécto Platóne.
Neápoli, in Campánia, sancti Máximi, Epíscopi et Mártyris; qui, ob strénuam Nicǽnæ fídei confessiónem, a Constántio Imperatóre in exsílium pulsus, ibídem, ærúmnis conféctus, decéssit.
Prusæ, in Bithýnia, sancti Timóthei, Epíscopi et Mártyris, qui, sub Juliáno Apóstata, cum Christum ejuráre noluísset, idcírco, ipsíus Imperatóris jussu, cápite abscíssus est.
Colóniæ Agrippínæ sancti Mauríni, Abbátis et Mártyris.
Nicomedíæ sancti Zacharíæ Mártyris.
In Hispánia sanctórum Mártyrum Críspuli et Restitúti.
In Africa sanctórum Mártyrum Arésii, Rogáti et aliórum quíndecim.
Petræ, in Arábia, sancti Astérii Epíscopi, qui, ob fidem cathólicam, ab Ariánis multa passus et ab Imperatóre Constántio in Africam relegátus est, ac tandem, in Ecclésiam suam restitútus, Conféssor gloriósus occúbuit.
Antisiodóri sancti Censúrii Epíscopi.