Décimo octávo Kaléndas Júlii
_
Sancti Basilíi, cognoménto Magni, Confessóris et Ecclésiæ Doctóris, qui Kaléndis Januárii obdormívit in Dómino, sed hac die potíssimum cólitur, qua Cæsariénsis in Cappadócia Epíscopus ordinátus est.
Samaríæ, in Palæstína, sancti Eliséi Prophétæ, cujus sepúlcrum, ubi et Prophéta quiéscit Abdías, a dæmónibus perhorrésci sanctus Hierónymus scribit.
Syracúsis, in Sicília, sancti Marciáni Epíscopi, qui, a beáto Petro Apóstolo ordinátus Epíscopus, ibídem, post Evangélii prædicatiónem a Judǽis occísus est.
Córdubæ, in Hispánia, sanctórum Mártyrum Anastásii Presbýteri, Felícis Mónachi, et Dignæ Vírginis.
Apud Suessiónes, in Gálliis, sanctórum Mártyrum Valérii et Rufíni, qui, in persecutióne Diocletiáni, a Prǽside Rictiováro, post multa torménta, jussi sunt decollári.
Constantinópoli sancti Methódii Epíscopi.
Viénnæ, in Gállia, sancti Æthérii Epíscopi.
Apud Rhuténos, in Gállia, sancti Quinctiáni Epíscopi.