Quintodécimo Kaléndas Júlii
_
Romæ natális sanctórum ducentórum et sexagínta duórum Mártyrum, qui, in persecutióne Diocletiáni, pro fide Christi sunt necáti, ac pósiti via Salária véteri, ad clivum Cucúmeris.
Vesontióne, in Gálliis, sancti Antídii, Epíscopi et Mártyris, qui, ob Christi fidem, a Wándalis occísus fuit.
Apollóniæ, in Macedónia, sanctórum Mártyrum Atheniénsium Isáuri Diáconi, Innocéntii, Felícis, Jeremíæ et Peregríni, qui, a Tripóntio Tribúno várie torti, cápite obtruncáti sunt.
Tarracínæ, in Campánia, sancti Montáni mílitis, qui, sub Hadriáno Imperatóre et Leóntio Consulári, post multa torménta, martýrii corónam accépit.
Apud Venáfrum, in Campánia, sanctórum Mártyrum Nicándri et Marciáni, qui, in persecutióne Maximiáni, cápite cæsi sunt.
Chalcedóne sanctórum Mártyrum Manuélis, Sabélis et Ismaélis, qui, pacis causa apud Juliánum Apóstatam pro Persárum Rege legatióne fungéntes, ab ipso Imperatóre, cum idóla venerári compelleréntur idque constánti ánimo recusárent, gládio feríri jubéntur.
Amériæ, in Umbria, sancti Himérii Epíscopi, cujus corpus Cremónam, in Insúbria, translátum est.
In pago Bituricénsi sancti Gundúlphi Epíscopi.
Aureliánis, in Gállia, sancti Avíti, Presbýteri et Confessóris.
In Phrýgia sancti Hypátii Confessóris.
Item sancti Bessariónis Anachorétæ.
Pisis, in Túscia, sancti Rainerii Confessóris.