Octávo Kaléndas Júlii
_
Natívitas sancti Joánnis Baptístæ, Præcursóris Dómini, ac sanctórum Zacharíæ et Elísabeth fílii, qui Spíritu Sancto replétus est adhuc in útero matris suæ.
Romæ commemorátio sanctórum plurimórum Mártyrum, qui a Neróne Imperatóre, ut a se incénsæ Urbis ódium avérteret, calumnióse accusáti, divérso mortis génere jussi sunt sævíssime intérfici. Horum síquidem álii, ferárum tergis contécti, laniátibus canum expósiti sunt; álii crúcibus affíxi; aliíque incéndio tráditi, ut, ubi defecísset dies, in usum noctúrni lúminis deservírent. Erant hi omnes Apostolórum discípuli, et primítiæ Mártyrum, quas Romána Ecclésia, fértilis ager Mártyrum, ante Apostolórum necem transmísit ad Dóminum.
Item Romæ sanctórum Mártyrum Fausti et aliórum vigínti trium.
Mechlíniæ, in Brabántia, pássio sancti Rumóldi, Epíscopi Dublinénsis et Mártyris, e Scotórum Rege progéniti.
Sátalis, in Arménia, sanctórum Mártyrum septem fratrum, scílicet Oréntii, Heróis, Pharnácii, Firmíni, Firmi, Cyríaci et Longíni mílitum; qui a Maximiáno Imperatóre, eo quod Christiáni essent, cíngulo militári priváti sunt, et, ab invícem separati atque in divérsa loca abdúcti, in dolóribus et ærúmnis pósiti, quievérunt in Dómino.
In vico Christólio, in território Parisiénsi, pássio sanctórum Mártyrum Agoárdi et Aglibérti, cum áliis innúmeris promíscui sexus.
Augustodúni deposítio sancti Simplícii, Epíscopi et Confessóris.
Láubiis, in Bélgio, sancti Theodúlphi Epíscopi.