Quarto Nonas Júlii
_
Stremótii, in Lusitánia, natális sanctæ Elísabeth Víduæ, Lusitanórum Regínæ, quam, virtútibus et miráculis claram, Urbánus Octávus, Póntifex Máximus, in Sanctórum númerum rétulit. Ejus tamen celébritas octávo Idus mensis hujus recólitur, ex dispositióne Innocéntii Papæ Duodécimi.
Sanctórum Osée et Aggǽi Prophetárum.
In território Bituricénsi sancti Lauriáni, Epíscopi Hispalénsis et Mártyris, cujus caput Híspalim, in Hispánia, delátum est.
In Africa natális sancti Jucundiáni Mártyris, pro Christo in mare demérsi.
Sírmii sanctórum Mártyrum Innocéntii et Sebástiæ, cum áliis trigínta.
Madáuri, in Africa, sancti Namphaniónis Mártyris et Sociórum, quos ille roborávit ad pugnam, et ad corónam provéxit.
Cyréne, in Líbya, sancti Theodóri Epíscopi, qui, in persecutióne Diocletiáni, sub Digniáno Prǽside, plumbátis cæsus et lingua abscíssus est; atque in pace tandem Conféssor occúbuit.
Augústæ, in Rhǽtia, sancti Uldaríci Epíscopi, miræ abstinéntiæ, largitátis et vigilántiæ virtúte, ac miraculórum dono illústris.
Turónis, in Gállia, Translátio sancti Martíni, Epíscopi et Confessóris; et Dedicátio Basílicæ suæ hoc ipso die, quo étiam is ante áliquot annos in Epíscopum fúerat ordinátus.