Nonis Júlii
_
Sanctórum Episcopórum et Confessórum Cyrílli et Methódii fratrum, quorum natális respectíve ágitur sextodécimo Kaléndas Mártii et octávo Idus Aprílis.
Romæ sanctórum Mártyrum Cláudii Commentariénsis, Nicostráti primiscrínii, qui fuit vir beátæ Mártyris Zoæ, Castórii, Victoríni et Symphoriáni; quos omnes sanctus Sebastiánus ad fidem Christi perdúxit, et beátus Polycárpus Présbyter baptizávit. Eósdem, in perquiréndis sanctórum Mártyrum corpóribus occupátos, Fabiánus Judex comprehéndi jussit, et, cum eos, per decem dies minis et blandítiis exágitans, in nullo pénitus posset commovére, jussit tértio torquéri, ac póstea in mare præcípites dari.
Dyrráchii, in Macedónia, sanctórum Mártyrum Peregríni, Luciáni, Pompéji, Hesýchii, Pápii, Saturníni et Germáni; qui, natióne Itáli, in persecutióne Trajáni, cum ad eam urbem confugíssent, et ibi sanctum Astíum Epíscopum, pro fide Christi, in cruce pendéntem vidérent, ac se páriter Christiános esse palam confiteréntur, ídeo, Prǽsidis jussu, tenti sunt atque in mare demérsi.
Bríxiæ sancti Apollónii, Epíscopi et Confessóris.
Eystádii, in Germánia, sancti Willebáldi, ejúsdem urbis primi Epíscopi, qui fílius éxstitit sancti Richárdi, Anglórum Regis, et frater sanctæ Walbúrgæ Vírginis; atque, una cum sancto Bonifátio, labórans in Evangélio, multas gentes convértit ad Christum.
Arvérnis, in Gállia, sancti Illídii Epíscopi.
Urgéllæ, in Hispánia Tarraconénsi, sancti Odónis Epíscopi.
In Anglia sancti Heddæ, Epíscopi Sáxonum occidentálium.
Alexandríæ natális sancti Pantǽni, viri Apostólici et omni sapiéntia adornáti, cui tantum stúdii et amóris erga verbum Dei fuit, ut étiam ad prædicándum Christi Evangélium géntibus quæ in Oriéntis últimis secéssibus recondúntur, fídei et devotiónis calóre succénsus, proféctus sit; ac demum, Alexandríam revérsus, ibi, sub Antoníno Caracálla, in pace quiévit.
Eboriáci, in território Meldénsi, sanctæ Edilbúrgæ, Abbatíssæ et Vírginis, Anglórum Regis fíliæ.
Perúsiæ Beáti Benedícti Papæ Undécimi, Tarvisíni, ex Ordine Prædicatórum, Confessóris; qui, brevi Pontificátus sui spátio, Ecclésiæ pacem, disciplínæ restauratiónem, religiónis increméntum mirífice promóvit.