Sextodécimo Kaléndas Augústi
_
Romæ sancti Aléxii Confessóris, ex Euphemiáno Senatóre progéniti. Hic, prima nocte nuptiárum, sponsa intácta, e domo sua abscédens, ac, post longam peregrinatiónem, ad Urbem rédiens, decem et septem annos tamquam egenus in domo patérna recéptus hospítio, nova mundum arte delúdens, incógnitus mansit; sed post óbitum, et voce per Urbis Ecclésias audíta et scripto suo agnítus, Innocéntio Primo Pontífice Máximo, ad sancti Bonifátii Ecclésiam summo honóre delátus est, ibíque multis miráculis cláruit.
Carthágine natális sanctórum Mártyrum Scillitanórum, id est Speráti, Narzális, Cythíni, Vetúrii, Felícis, Acyllíni, Lætántii, Januáriæ, Generósæ, Vestínæ, Donátæ et Secúndæ; qui, jussu Saturníni Præfécti, post primam Christi confessiónem, in cárcerem trusi et in ligno confíxi, deínde gládio decolláti sunt. Speráti autem relíquiæ, cum óssibus beáti Cypriáni et cápite sancti Pantaleónis Mártyris, ex Africa in Gállias translátæ, Lugdúni, in Basílica sancti Joánnis Baptístæ, religióse cónditæ fuérunt.
Amástride, in Paphlagónia, sancti Hyacínthi Mártyris, qui sub Castrítio Prǽside, multa passus, quiévit in cárcere.
Tíbure sancti Generósi Mártyris.
Constantinópoli sanctæ Theodótæ Mártyris, sub Leóne Iconoclásta.
Romæ deposítio sancti Leónis Papæ Quarti.
Pápiæ sancti Ennódii, Epíscopi et Confessóris.
Antisiodóri sancti Theodósii Epíscopi.
Medioláni sanctæ Marcéllinæ Vírginis, soróris beáti Ambrósii Epíscopi, quæ Romæ, in Basílica sancti Petri, a Libério Papa velum consecratiónis accépit; cujus étiam sanctitátem idem beátus Ambrósius scriptis suis testátam facit.
Venétiis Translátio sanctæ Marínæ Vírginis.