Quartodécimo Kaléndas Augústi
_
Sancti Vincéntii a Paulo, Presbýteri et Confessóris, Congregatiónis Presbyterórum Missiónis et Puellárum Caritátis Fundatóris, cæléstis ómnium caritátis Societátum Patróni; qui in Dómino obdormívit quinto Kaléndas Octóbris.
Colóssis, in Phrýgia, natális sancti Epaphræ, quem sanctus Paulus Apóstolus concaptívum appéllat. Hic, ab eódem Apóstolo Colóssis Epíscopus ordinátus, ibídem, clarus virtútibus, martýrii palmam, pro óvibus sibi commendátis, viríli agóne percépit; cujus corpus Romæ, in Basílica sanctæ Maríæ Majóris, cónditum est.
Tréviris sancti Martíni, Epíscopi et Mártyris.
Híspali, in Hispánia, pássio sanctárum Vírginum Justæ et Rufínæ, quæ, a Prǽside Diogeniáno comprehénsæ, primo equúlei extensióne et ungulárum laniatióne vexátæ, póstea cárcere, inédia et váriis torsiónibus sunt afflíctæ; tandem Justa in cárcere spíritum exhalávit, Rufínæ vero cervix, in confessióne Dómini, confrácta est.
Córdubæ, in Hispánia, sanctæ Aureæ Vírginis, beatórum Adúlphi et Joánnis Mártyrum soróris; quæ aliquándo in apostasíæ crimen a Mahumetáno Júdice indúcta est, sed mox, facti pǽnitens, iteráto certámine, hostem effúso sánguine superávit.
Romæ sancti Sýmmachi Papæ, qui, a schismaticórum factióne diútius fatigátus, demum, sanctitáte conspícuus, migrávit ad Dóminum.
Verónæ sancti Felícis Epíscopi.
Apud Scetim, Ægýpti montem, sancti Arsénii, Románæ Ecclésiæ Diáconi; qui, Theodósii témpore, in solitúdinem secéssit, ibíque, virtútibus ómnibus consummátus et jugi lacrimárum imbre perfúsus, spíritum Deo réddidit.
In Cappadócia sanctæ Macrínæ Vírginis, fíliæ sanctórum Basilíi et Emméliæ, atque soróris item sanctórum Episcopórum Basilíi Magni, Gregórii Nysséni et Petri Sebasténsis.