Quarto Nonas Augústi
_
Sancti Alfónsi-Maríæ de Ligório, Fundatóris Congregatiónis a sanctíssimo Redemptóre nuncupátæ, Epíscopi sanctæ Agathæ Gothórum, Confessóris et Ecclésiæ Doctóris, qui requiévit in Dómino prídie hujus diéi.
Romæ, in cœmetério Callísti, natális sancti Stéphani Primi, Papæ et Mártyris; qui, in persecutióne Valeriáni, dum Missæ Sacrum perágeret, et, superveniéntibus milítibus, ante altáre intrépidus et immóbilis cœpta mystéria perfíceret, in sede sua decollátus est.
Nicǽæ, in Bithýnia, pássio sanctæ Theodótæ, cum tribus fíliis suis. Ex his primogénitum, nómine Evódium, cum Christum fiduciáliter confiterétur, fecit primo Nicétius, Consuláris Bithýniæ, fústibus cædi; deínde matrem, cum ómnibus fíliis, igne consúmi.
In Africa sancti Rutílii Mártyris, qui cum sǽpius, de loco in locum fúgiens, persecutiónem declinásset, et perículum intérdum étiam pecúnia redemísset, ex inopináto aliquándo comprehénsus est, et, Prǽsidi oblátus, torméntis cruciátur plúrimis; demum, ígnibus tráditus, egrégio martýrio coronátur.
Patávii sancti Máximi, ejúsdem civitátis Epíscopi, qui, miráculis clarus, beáto fine quiévit.