Prídie Kaléndas Septémbris
_
Sancti Raymúndi Nonnáti, ex Ordine beátæ Maríæ de Mercéde redemptiónis captivórum, Cardinális et Confessóris; cujus dies natális séptimo Kaléndas Septémbris recólitur.
Apud montem Senárium, in Etrúria, natális sancti Bonajúnctæ Confessóris, e septem Fundatóribus Ordinis Servórum beátæ Maríæ Vírginis; qui, de Passióne Domínica ad fratres verba fáciens, in manus Dómini trádidit spíritum. Ipsíus autem ac Sociórum festum prídie Idus Februárii celebrátur.
Tréviris item natális sancti Paulíni Epíscopi, qui, témpore Ariánæ infestatiónis, ab Ariáno Imperatóre Constántio ob cathólicam fidem relegátus exsílio, et extra Christiánum nomen usque ad mortem mutándo exsília fatigátus, tandem, apud Phrýgiam defúnctus, beátæ passiónis corónam percépit a Dómino.
Tránsaquis, ad lacum Fúcinum, in Marsis, natális quoque sanctórum Mártyrum Cæsídii Presbýteri, et Sociórum; qui martýrio coronáti sunt in persecutióne Maximíni.
Item sanctórum Mártyrum Robustiáni et Marci.
Cæsaréæ, in Cappadócia, sanctórum Theódoti, Rufínæ et Ammiæ; quorum duo primi paréntes fuérunt sancti Mamántis Mártyris, quem Rufína in cárcere péperit, et Ammia educávit.
Antisiodóri sancti Optáti, Epíscopi et Confessóris.
In Anglia sancti Aidáni, Epíscopi Lindisfarnénsis; cujus ánimam, cum sanctus Cuthbértus, cujus memória tertiodécimo Kaléndas Aprílis cólitur, tunc óvium pastor, in cælum ferri vidísset, relíctis óvibus, factus est Mónachus.
Apud Nuscum sancti Amáti Epíscopi.
Athénis sancti Aristídis, fide et sapiéntia claríssimi, qui Hadriáno Príncipi egrégium de religióne Christiána volúmen óbtulit, nostri dogmátis cóntinens ratiónem; et quod Christus Jesus solus esset Deus, præsénte ipso Imperatóre, luculentíssime perorávit.