Séptimo Idus Septémbris
_
Trecis, in Gállia, sancti Nemórii Diáconi, et Sociórum Mártyrum, quos Attíla, Rex Hunnórum, interfécit.
Nicomedíæ natális beáti Joánnis Mártyris, qui, cum vidéret crudélia advérsus Christiános edícta in foro pendére, hinc, fídei ardóre accénsus, injécta manu, illa detráxit atque discérpsit. Cumque hoc relátum esset Diocletiáno et Maximiáno Augústis, in eádem urbe constitútis, ómnia suppliciórum génera in eum experíri jussérunt; quæ vir nobilíssimus tanta vultus ac spíritus alacritáte pértulit, ut ne tristis quidem pro his vidéri potúerit.
Cæsaréæ, in Cappadócia, sancti Eupsýchii Mártyris, qui, sub Hadriáno Imperatóre, accusátus quod Christiánus esset, in cárcerem conjéctus est; et, paulo post inde emíssus, patrimónium statim véndidit, et prétium partim paupéribus, partim accusatóribus, tamquam benefactóribus, distríbuit. Sed, íterum comprehénsus, atque, cum sacrificáre nollet idólis, sævíssime dilaniátus et gládio confóssus, sub Saprítio Júdice martýrium consummávit.
Pompejópoli, in Cilícia, sancti Sozóntis Mártyris, qui sub Maximiáno Imperatóre, in ignem injéctus, réddidit spíritum.
Aquiléjæ sancti Anastásii Mártyris.
Apud Aléxiam véterem, in território Augustodunénsi, sanctæ Regínæ, Vírginis et Mártyris; quæ, sub Procónsule Olýbrio, cárceris et equúlei ac lampadárum afflícta supplíciis, demum, cápite damnáta, migrávit ad Sponsum.
Aureliánis, in Gállia, deposítio sancti Evórtii Epíscopi, qui, primo Románæ Ecclésiæ Subdiáconus, dehinc divíno múnere per colúmbam designátus est Póntifex præfátæ urbis.
In Gállia sancti Augustális, Epíscopi et Confessóris.
Cápuæ sancti Pámphili Epíscopi.
In território Parisiénsi sancti Clodoáldi, Presbýteri et Confessóris.