Tertiodécimo Kaléndas Octóbris
_
Putéolis, in Campánia, sanctórum Mártyrum Januárii, Beneventánæ civitátis Epíscopi, ejúsque Diáconi Festi, et Desidérii Lectóris, Sósii, Diáconi Ecclésiæ Misenátis, Próculi, Diáconi Puteoláni; Eutýchii et Acútii. Hi omnes, post víncula et cárceres, cápite cæsi sunt, sub Diocletiáno Príncipe. Corpus sancti Januárii delátum fuit Neápolim, atque honorífice in Ecclésia tumulátum; ubi étiam beatíssimi Mártyris sanguis in ampúlla vitrea adhuc servátur, qui, in conspéctu cápitis illíus pósitus, velut recens liquéscere et ebullíre conspícitur.
In Palæstína sanctórum Mártyrum et Ægýpti Episcopórum Pélei, Nili et Elíæ; qui, témpore persecutiónis Diocletiáni, cum plúrimis Cléricis, pro Christo sunt igne consúmpti.
Nucériæ natális sanctórum Mártyrum Felícis et Constántiæ, qui passi sunt sub Neróne.
Eódem die sanctórum Mártyrum Tróphimi, Sabbátii et Dorymedóntis, sub Probo Imperatóre. Ex eis Sabbátius Antiochíæ, jussu Attici Prǽsidis, támdiu flagris cæsus est, donec emítteret spíritum; Tróphimus vero, Sýnnadam, in Phrýgia, ad Perénnium Prǽsidem missus, ibi, post multos cruciátus, cum Dorymedónte Senatóre, cápitis decollatióne martýrium consummávit.
Eleutherópoli, in Palæstína, sanctæ Susánnæ, Vírginis et Mártyris; quæ, orta ex idolórum sacerdóte Arthémio et Judǽa mulíere Martha, ad Christiánam fidem, paréntibus mórtuis, est convérsa, atque ob eándem fidem ab Alexándro Præfécto várie torta et in cárcerem trusa, ibi orans migrávit ad Sponsum.
Córdubæ, in Hispánia, sanctæ Pompósæ, Vírginis et Mártyris; quæ in persecutióne Arábica, ob impávidam Christi confessiónem decolláta gládio, palmam consecúta est.
Cantuáriæ sancti Theodóri Epíscopi, qui, a beáto Vitaliáno Papa in Angliam missus, doctrína et sanctitáte refúlsit.
Turónis, in Gállia, sancti Eustóchii Epíscopi, magnárum virtútum viri.
In território Lingoniénsi sancti Séquani, Presbýteri et Confessóris.
Barcinóne, in Hispánia, beátæ Maríæ de Cervellióne, ex Ordine beátæ Maríæ de Mercéde redemptiónis captivórum, Vírginis; quæ, ob præséntem quam invocántibus confert opem, María de Subsídio vulgo nuncupátur.
In vico Druelle, in diœcési Ruthenénsi, in Gállia, sanctæ Maríæ Guliélmæ-Æmíliæ de Rodat, Vírginis, Congregatiónis Sorórum a sancta Família Fundatrícis, puéllis erudiéndis et egénis sublevándis addictíssimæ, quæ a Pio Duodécimo, Pontífice Máximo, inter sanctas Vírgines reláta est.