Sexto Nonas Octóbris
_
Festum sanctórum Angelórum Custódum.
Romæ pássio sancti Modésti Sardi, Levítæ et Mártyris; qui, sub Diocletiáno Imperatóre, equúleo tortus atque igne adústus est. Ipsíus vero corpus, Benevéntum póstea translátum, in Ecclésia suo insigníta nómine collocátum fuit.
In território Atrebaténsi item pássio beáti Leodegárii, Augustodunénsis Epíscopi; quem, váriis injúriis et divérsis supplíciis pro veritáte afflíctum, Ebroínus, Major domus régiæ Theodoríci, intérfici jussit.
Nicomedíæ sancti Eleuthérii, mílitis et Mártyris, cum áliis innúmeris; qui, cum Diocletiáni régia incéndio conflagrásset et falso hujus críminis essent accusáti, omnes, jubénte eódem sævíssimo Imperatóre, acervátim necáti sunt. Horum porro álii gládiis obtruncabántur, álii cremabántur ígnibus, álii in mare præcipitabántur; sed inter eos primus Eleuthérius, cum per síngula torménta, diu cruciátus, valídior redderétur, martýrium victóriæ suæ, ígnibus velut aurum examinátus, complévit.
Antiochíæ sanctórum Mártyrum Primi, Cyrílli et Secundárii.
Eódem die sancti Geríni Mártyris, qui frater éxstitit beáti Leodegárii, Augustodunénsis Epíscopi, et, jubénte ipso Ebroíno, lapídibus óbrutus est.
Constantinópoli sancti Theóphili Mónachi, qui, pro defensióne sanctárum Imáginum a Leóne Isáurico sævíssime cæsus et in exsílium pulsus, migrávit ad Dóminum.