Tértio Nonas Octóbris
_
Messánæ, in Sicília, natális sanctórum Mártyrum Plácidi Mónachi, e beáti Benedícti Abbátis discípulis, et ejus fratrum Eutýchii et Victoríni, ac soróris eórum Fláviæ Vírginis, itémque Donáti, Firmáti Diáconi, Fausti et aliórum trigínta Monachórum, qui omnes a Manúcha piráta, pro Christi fide, necáti sunt.
Apud Smyrnam item natális beáti Thraséæ, Epíscopi Euméniæ, martýrio consummáti.
Antisiodóri deposítio sanctórum germanórum Firmáti Diáconi, et Flaviánæ Vírginis.
Tréviris sanctórum Mártyrum Palmátii et Sociórum; qui, in persecutióne Diocletiáni, sub Rictiováro Prǽside, martýrium subiérunt.
Eódem die pássio sanctæ Charitínæ Vírginis, quæ, sub Diocletiáno Imperatóre et Domítio Consulári, ígnibus est cruciáta et in mare projécta, et, cum inde incólumis evasísset, tandem, mánibus et pédibus abscíssis dentibúsque convúlsis, in oratióne spíritum emísit.
Ravénnæ sancti Marcellíni, Epíscopi et Confessóris.
Valéntiæ, in Gállia, sancti Apollináris Epíscopi, cujus vita virtútibus fuit illústris, et mors signis ac prodígiis decoráta.
Eódem die sancti Attiláni, Epíscopi Zamorénsis, quem beátus Urbánus Papa Secúndus in Sanctórum númerum rétulit.
Romæ sanctæ Gallæ Víduæ, fíliæ Sýmmachi Cónsulis, quæ, viro suo defúncto, apud Ecclésiam beáti Petri multis annis oratióni, eleemósynis, jejúniis aliísque sanctis opéribus inténta permánsit; cujus felicíssimum tránsitum sanctus Gregórius Papa descrípsit.