Prídie Nonas Octóbris
_
In monastério Turris, diœcésis Squillacénsis, in Calábria, sancti Brunónis Confessóris, qui Ordinis Carthusianórum fuit Institútor.
Laodicéæ, in Phrýgia, beáti Ságaris, Epíscopi et Mártyris; qui éxstitit unus de antíquis Pauli Apóstoli discípulis.
Antisiodóri sancti Románi, Epíscopi et Mártyris.
Cápuæ natális sanctórum Mártyrum Marcélli, Casti, Æmílii et Saturníni.
Tréviris commemorátio innumerabílium fere Mártyrum, qui, in persecutióne Diocletiáni, sub Rictiováro Prǽside, ob Christi fidem, vario mortis génere necáti sunt.
Agénni, in Gállia, natális sanctæ Fídei, Vírginis et Mártyris; cujus exémplo beátus Caprásius, ad martýrium animátus, agónem suum tertiodécimo Kaléndas Novémbris felíciter consummávit.
Item sanctæ Erótidis Mártyris, quæ, Christi amóre succénsa, ignis superávit incéndium.
Opitérgii, in Venetórum fínibus, sancti Magni Epíscopi, cujus corpus Venétiis requiéscit.
Neápoli, in Campánia, deposítio sanctæ Maríæ-Francíscæ a Quinque Vulnéribus Dómini nostri Jesu Christi, Vírginis, ex tértio Ordine sancti Francísci, quæ, virtútibus et miráculis clara, a Pio Papa Nono sanctis Virgínibus adscrípta fuit.