Nonis Octóbris
_
Festum sacratíssimi Rosárii beátæ Maríæ Vírginis; itémque sanctæ Maríæ de Victória commemorátio, quam sanctus Pius Quintus, Póntifex Máximus, ob insígnem victóriam a Christiánis bello naváli, ejúsdem sanctíssimæ Dei Genitrícis auxílio, hac ipsa die de Turcis reportátam, quotánnis fíeri instítuit.
Romæ, via Ardeatína, deposítio sancti Marci, Papæ et Confessóris.
In Província quæ nuncupátur Augústa Euphratésia, sanctórum Mártyrum Sérgii et Bacchi, nobílium Romanórum, sub Maximiáno Imperatóre. Ex his Bacchus támdiu nervis crudis cæsus est, quoadúsque, toto córpore discíssus, in Christi confessióne emítteret spíritum; Sérgius vero clavátis cothúrnis pedes indútus, et, cum in fide fixus manéret, data senténtia, jussus est decollári. Beáti autem Sérgii nómine locus ubi quiéscit, Sergiópolis appellátus est, et, ob præclára mirácula, frequénti Christianórum concúrsu honorátur.
Romæ sanctórum Mártyrum Marcélli et Apuléji, qui prius quidem Simóni mago adhæsérunt; sed, vidéntes mirabília quæ per Apóstolum Petrum Dóminus operabátur, ambo, relícto Simóne, se doctrínæ Apostólicæ tradidérunt, ac, post passiónem Apostolórum, sub Aureliáno Consulári, corónam martýrii reportárunt, sepultíque sunt non longe ab Urbe.
Item apud Augústam Euphratésiam sanctæ Júliæ Vírginis, quæ, sub Marciáno Prǽside, martýrium consummávit.
Patávii sanctæ Justínæ, Vírginis et Mártyris; quæ, a beáto Prosdócimo, sancti Petri discípulo, baptizáta, et, cum in fide Christi constánter persísteret, Máximi Prǽsidis jussu, transverberáta gládio, migrávit ad Dóminum.
Apud Bitúricas, in Aquitánia, sancti Augústi Presbýteri et Confessóris.
In pago Rheménsi sancti Heláni Presbýteri.
In Suécia Translátio córporis sanctæ Birgíttæ Víduæ.