Kaléndis Novémbris
_
Festívitas ómnium Sanctórum, quam in honórem beátæ Dei Genitrícis Vírginis Maríæ et sanctórum Mártyrum Bonifátius Papa Quartus, cum templum Pántheon tértio Idus Maji dedicásset, célebrem et generálem instítuit agi quotánnis in urbe Roma. Sed et Gregórius item Quartus póstmodum decrévit, eándem festivitátem, quæ váriis modis jam in divérsis Ecclésiis celebrabátur, in honórem ómnium Sanctórum solémniter hac die ab univérsa Ecclésia perpétuo observári.
In Pérside sanctórum Mártyrum Joánnis Epíscopi, et Jacóbi Presbýteri, sub Sápore Rege.
Tarracínæ, in Campánia, natális sancti Cæsárii Diáconi, qui, diébus multis in custódia macerátus, póstea, cum sancto Juliáno Presbýtero, in saccum missus et in mare præcipitátus est.
In castro Divióne sancti Benígni Presbýteri, qui a beáto Polycárpo missus est in Gálliam ad prædicándum Evangélium; et, postquam, sub Marco Aurélio Imperatóre, a Teréntio Júdice gravíssimis torméntis multiplíciter est afflíctus, tandem ejus collum vecte férreo tundi et corpus láncea perforári jubétur.
Damásci pássio sanctórum Cæsárii, Dácii et aliórum quinque.
Eódem die sanctæ Maríæ ancíllæ, quæ, Christiánæ religiónis nómine accusáta, hinc, sub Hadriáno Imperatóre, diris verbéribus afflícta, equúlei extensiónem et ungulárum laceratiónem passa, martýrium complévit.
Tarsi, in Cilícia, sanctárum Cyréniæ et Juliánæ Mártyrum, sub Maximiáno Imperatóre.
Arvérnis, in Gállia, sancti Austremónii, qui fuit primus ejúsdem civitátis Epíscopus.
Lutétiæ Parisiórum deposítio sancti Marcélli Epíscopi. 
Bajócis, in Gállia, sancti Vigóris Epíscopi, témpore Childebérti, Francórum Regis.
Andégavi, in Gállia, deposítio sancti Licínii Epíscopi, venerábilis sanctitátis viri.
Tíbure sancti Severíni Mónachi.
Lyricánti, in Wastinénsi Gálliæ território, sancti Maturíni Confessóris.