Tertiodécimo Kaléndas Decémbris
_
In óppido Marpúrgi, in Germánia, deposítio sanctæ Elísabeth Víduæ, Regis Hungarórum Andréæ fíliæ, ex tértio Ordine sancti Francísci, quæ, pietátis opéribus assídue inténta, miráculis clara migrávit ad Dóminum.
Sancti Pontiáni, Papæ et Mártyris; cujus dies natális tértio Kaléndas Novémbris recensétur.
Samaríæ, in Palæstína, sancti Abdíæ Prophétæ.
Romæ, via Appia, natális sancti Máximi, Presbýteri et Mártyris, qui, in persecutióne Valeriáni passus, pósitus est ad sanctum Xystum.
In civitáte Astiagénsi, in Hispánia, beáti Crispíni Epíscopi, qui, cápite amputáto, martýrii glóriam adéptus est.
Eódem die sancti Fausti, Diáconi Alexandríni, qui primum, in persecutióne Valeriáni, cum sancto Dionýsio, in exsílium missus est; deínde, ætáte longǽvus, in persecutióne Diocletiáni, animadvérsus gládio martýrium consummávit.
Cæsaréæ, in Cappadócia, sancti Bárlaam Mártyris, qui, agréstis licet et rudis, Christi sapiéntia munítus tyránnum vicit, et ignem ipsum per invíctam fídei constántiam superávit; in cujus die natáli sanctus Basilíus Magnus célebrem hábuit oratiónem.
Viénnæ, in Gállia, sanctórum Mártyrum Severíni, Exsupérii et Feliciáni; quorum córpora, post multa annórum currícula, ipsis revelántibus, invénta, et a Pontífice, clero et pópulo illíus urbis honorífice subláta, condígno honóre cóndita sunt.
In Isáuria pássio sanctórum Azæ et Sociórum centum quinquagínta mílitum, sub Diocletiáno Imperatóre et Aquilíno Tribúno.