Tertiodécimo Kaléndas Januárii
_
Vigília sancti Thomæ Apóstoli.
Romæ natális sancti Zephyríni, Papæ et Mártyris. Ipsíus tamen festum recólitur séptimo Kaléndas Septémbris.
Ibídem pássio sancti Ignátii, Epíscopi et Mártyris; qui, tértius post beátum Petrum Apóstolum, Antiochénam rexit Ecclésiam. Hic, in persecutióne Trajáni, damnátus ad béstias, Romam vinctus míttitur; ibíque, circumsedénte Senátu, immaníssimis pœnárum supplíciis primo est afféctus, dehinc objícitur leónibus, quorum déntibus præfocátus, hóstia Christi effícitur. Ejus vero festívitas Kaléndis Februárii celebrátur.
Item Romæ sanctórum Mártyrum Liberáti et Bájuli.
In Arábia sanctórum Mártyrum Eugénii et Macárii Presbyterórum, qui a Juliáno Apóstata, cum ipsíus impietátem arguíssent, sævíssimis plagis affécti sunt, atque in vastíssimam erémum relegáti, et gládio cæsi.
Alexandríæ sanctórum mílitum et Mártyrum Ammónis, Zenónis, Ptolemǽi, Ingenis et Theóphili; qui, tribunálibus astántes, cum quidam Christiánus, in supplíciis pósitus, trepidáret et jam prope ad negándum declináret, vultu, óculis ac nútibus illum conabántur erígere. Cumque hac de causa clamor totíus pópuli in eos prosilíret, prorumpéntes in médium se Christiános esse testáti sunt; per quorum victóriam Christus, qui suis eam animi constántiam déderat, gloriosíssime triumphávit.
Géldubæ, in Germánia, sancti Júlii Mártyris.
Antiochíæ natális sancti Philogónii Epíscopi, qui, Dei nutu ex causídico ad eam Ecclésiam regéndam accersítus, advérsus Aríum, una cum sancto Alexándro Epíscopo et Sóciis, primum pro fide cathólica certámen íniit, clarúsque méritis quiévit in Dómino; cujus ánnuam festivitátem sanctus Joánnes Chrysóstomus præcláro encómio celebrávit.
Bríxiæ sancti Domínici, Epíscopi et Confessóris.
In Hispánia deposítio sancti Domínici de Sylos Abbátis, e sancti Benedícti Ordine, miráculis in captivórum liberatióne celebérrimi.