26:1 Dóminus lux mea et salus mea: * quem timébo? 26:2 Dóminus præsídium vitæ meæ: * a quo trepidábo? 26:3 Quum invádunt me malígni, * ut edant carnem meam, 26:4 Hostes mei et inimíci mei, * labúntur et cadunt. 26:5 Si stéterint advérsum me castra, * non timébit cor meum; 26:6 Si surréxerit contra me bellum, * ego confídam. 26:6 Unum peto a Dómino; hoc requíro: * ut hábitem in domo Dómini cunctis diébus vitæ meæ, 26:6 Ut fruar suavitáte Dómini, * et aspíciam templum ejus. 26:6 Etenim abscóndet me in tentório suo die malo, * occultábit me in ábdito tabernáculi sui. 26:6 In petram extóllet me. * et nunc caput meum erígitur super inimícos qui circúmstant me, 26:6 Et immolábo in tabernáculo ejus hóstias exsultatiónis, * cantábo et psallam Dómino. 26:7 Audi, Dómine, vocem meam qua clamo, * miserére mei et exáudi me. 26:8 Tibi lóquitur cor meum; te quærit fácies mea; * fáciem tuam, Dómine, quæro. 26:9 Noli abscóndere fáciem tuam a me, * noli repéllere in ira servum tuum. 26:10 Auxílium meum es tu; * ne abjéceris me, neve derelíqueris me, Deus, salvátor meus. 26:11 Si pater meus et mater mea derelíquerint me, * Dóminus tamen me suscípiet. 26:12 Doce me, Dómine, viam tuam, * et deduc me in sémita plana propter adversários meos. 26:13 Ne tradíderis me desidério inimicórum meórum, * quóniam insurrexérunt in me testes mendáces et qui violéntiam spirant. 26:14 Credo visúrum me bona Dómini * in terra vivéntium. 26:14 Exspécta Dóminum, esto fortis, * et roborétur cor tuum, et exspécta Dóminum.