80:1 Exsultáte Deo adjutóri nostro, * acclamáte Deo Jacob. 80:2 Sonáte psaltério, et pulsáte týmpanum, * cítharam dulce sonántem cum lyra. 80:3 Clángite in neoménia búcina, * in plenilúnio, die solémni nostro, 80:4 Quia institútum Israël est, * præcéptum Dei Jacob. 80:5 Legem státuit hanc in Joseph, * cum prodíret contra terram Ægýpti. Linguam quam non nóveram, audívi: 80:6 Liberávi ab ónere húmerum ejus; * manus ejus a cóphino cessárunt. 80:7 In tribulatióne clamásti, et erípui te; * ex nube tonánti respóndi tibi, probávi te apud aquam Meríba. 80:8 Audi, pópule meus, et monébo te: * Israël, útinam áudias me! Non erit apud te deus aliénus, neque adorábis deum peregrínum: 80:9 Ego sum Dóminus, Deus tuus, qui edúxi te de terra Ægýpti: * diláta os tuum, et implébo illud. 80:10 Sed non audívit pópulus meus vocem meam, * et Israël non obtemperávit mihi. 80:11 Ideo trádidi eos durítiæ cordis eórum: * ámbulent secúndum consília sua. 80:12 Utinam pópulus meus audíret me, * Israël ambuláret in viis meis: 80:13 Conféstim deprímerem inimícos eórum, * et contra adversários eórum, vérterem manum meam; 80:14 Qui odérunt Dóminum, blandiréntur ei, * et sors eórum manéret in perpétuum. 80:15 Illum autem cibárem de medúlla trítici, * et melle de petra saturárem eum.