03-26# Ex Régula Sancti Patri Nostri Benedícti. Caput 46: De his qui in áliis quibúslibet rebus delínquunt 
_
Si quis dum in labóre quovis, in coquína, in cellário, in ministério, in pistríno, in horto, in arte áliqua dum labórat, vel in quocúmque loco, áliquid delíquerit, aut frégerit quíppiam aut perdíderit, vel áliud quid excésserit ubíubi, et non véniens contínuo ante abbátem vel congregatiónem ipse ultro satisfécerit et prodíderit delíctum suum, dum per álium cógnitum fúerit, majóri subjáceat emendatióni. Si ánimæ vero peccáti causa fúerit latens, tantum abbáti aut spirituálibus senióribus patefáciat, qui sciat curáre et sua et aliéna vúlnera, non detégere et publicáre.