[Rank]
S. Raymundi de Peñafort Confessoris;;Semiduplex;;2.2;;vide C5

[Rule]
vide C5;mtv
9 lectiones

[Oratio]
Deus, qui beátum Raymúndum pœniténtiæ sacraménti insígnem minístrum elegísti, et per maris undas mirabíliter traduxísti: concéde; ut ejus intercessióne dignos pœniténtiæ fructus fácere, et ad ætérnæ salútis portum perveníre valeámus.
$Per Dominum

[Commemoratio]
!Commemoratio S. Emerentianæ, Virginis et Martyris
@Commune/C6:Oratio proper
$Oremus
v. Indulgéntiam nobis, quǽsumus, Dómine, beáta Emerentiána Virgo et Martyr implóret: quæ tibi grata semper éxstitit, et mérito castitátis, et tuæ professióne virtútis.
$Per Dominum

[Lectio4]
Beátus Raymundus Barcinonénsis, ex nobili família de Péñafort, christianæ religiónis rudimentis imbutus, adhuc párvulus exímia animi et corporis índole magnum aliquid portendere visus est. Nam adoléscens humaniores litteras in pátria proféssus, Bonóniam se cóntulit, ubi pietátis officiis ac pontificio civilíque juri sedulo incumbens, et doctoris laurea insignítus, ibidem sacros cánones magna cum hóminum admiratióne est interpretatus. Ejus virtútum fama percrebrescente, Berengarius Barcinonénsis epíscopus, cum Roma suam ad ecclésiam rediret, eum conveniéndi causa Bonóniam iter instituit, et tandem summis precibus, ut secum in pátriam reverterétur, obtinuit. Mox ejusdem ecclésiæ canonicatu et præpositura ornatus, universo clero et pópulo, integritate, modestia, doctrina et morum suavitáte præfulsit, ac Deíparæ Vírginis, quam singulari pietátis afféctu venerabátur, honórem et cultum semper pro viribus auxit.

[Lectio5]
Annum circiter quintum supra quadragesimum agens, in ordine fratrum Prædicatórum solemni emissa professióne, ut novus miles, in omni virtútum genere, sed præcipue in caritate erga egénos, et maxime captivos ab infidelibus detentos, se exercuit. Unde cum ejus hortatu sanctus Petrus Nolascus (cujus ipse confessiónes audiebat) suas opes piíssimo huic operi conferret, tum eidem, tum beato Raymundo, et Jacobo primo Aragoniæ regi apparens beatíssima Virgo, gratíssimum sibi et unigenito Fílio suo fore dixit, si in suum honórem instituerétur ordo religiosórum, quibus captivos ex infidelium tyrannide liberándi cura incumberet. Quare collátis inter se consíliis, ordinem beátæ Maríæ de mercede redemptiónis captivórum fundavérunt: cui beátus Raymundus certas vivéndi leges præscripsit ad ejusdem ordinis vocatiónem accommodatíssimas, quarum approbatiónem aliquot post annos a Gregório nono impetrávit, et dictum sanctum Petrum primum generalem ordinis magistrum suis ipse mánibus habitu eodem indutum creávit.

[Lectio6]
Ab eodem Gregório Romam accersítus, et capellani ac pœnitentiarii et confessarii sui munere decoratus, ejusdem jussu Romanórum Pontificum decreta, in diversis conciliis et epistolis sparsa, in unum Decretalium volúmen redégit. Archiepiscopátum Tarraconensem ab ipso Pontifice sibi oblátum constantíssime recusávit, et totius ordinis Prædicatórum, generale magistérium, quod per biennium sanctíssime administraverat, sponte dimísit. Jacobo Aragoniæ regi sacræ Inquisitiónis officii suis in regnis instituéndi auctor fuit. Multa patrávit miracula, inter quæ illud claríssimum, quod ex insula Baleari Majori Barcinónem reversurus, strato super aquas pallio centum sexagínta milliaria sex horis confécerit et suum cœnobium januis clausis fúerit ingréssus. Tandem prope centenarius, virtútibus et meritis cumulátus, obdormívit in Dómino, anno salútis millesimo ducentésimo septuagesimo quinto. Quem Clemens octavus in Sanctórum númerum rétulit.

[Lectio93]
!Commemoratio S. Emerentianæ.
Emerentiána virgo Romana, collactanea beátæ Agnetis, adhuc catechumena, fide et caritate flagrans, furéntes in Christiános idolórum cultores cum vehementius accusaret, a concitáta multitúdine lapidibus óbruta est. Quæ in cruciátibus orans ad sepúlcrum sanctæ Agnetis, proprio sánguine, quem pro Christo constanter effudit, baptizata, ánimam Deo réddidit.
&teDeum

[Lectio94]
Raymúndus Barcinonénsis, ex nóbili família de Péñafort, Bonóniæ pietátis offíciis ac pontifício civilíque juri sédulo incúmbens ac doctóris láurea insignítus, ibídem sacros cánones magna cum laude est interpretátus. Mox Barcinonénsis ecclésiæ canonicátu et præpositúra ab antístite Berengário ornátus, virtúte, doctrína et morum suavitáte præfúlsit, ac Deíparæ Vírginis cultum pro víribus auxit. Annum agens quadragésimum quintum inter fratres Prædicatóres adscítus, auctor fuit, ut sanctus Petrus Noláscus (cujus ipse confessiónes audiébat) una cum Jacóbo primo Aragóniæ rege, órdinem beátæ Maríæ de mercéde redemptiónis captivórum fundáverit, cui ipse Raymúndus probatíssimas vivéndi leges præscrípsit. Jussu Gregórii noni Romæ summórum Pontíficum decréta in unum Decretálium volúmen redégit. Tarraconénsi archiepiscopátu constantíssime recusáto, et magistério generáli órdinis Prædicatórum, quod per biénnium sanctíssime administráverat, dimísso, prope centenárius obdormívit in Dómino, anno salútis millésimo ducentésimo septuagésimo quinto. Quem Clemens octávus in Sanctórum númerum rétulit.
&teDeum