[Rank]
S. Martinae Virginis et Martyris;;Semiduplex;;2;;vide C6

[Rule]
vide C6;
9 lectiones

[Oratio]
Deus, qui inter cetera potentiae tuae miracula, etiam in sexu fragili victoriam~
martyrii contulisti: concede propitius; ut, qui beatae Martinae Virginis et~
Martyris tuae natalitia colimus, per ejus ad te exempla gradiamur.
$Per Dominum

[Hymnus Matutinum]
v. Martinae celebri plaudite nomini
Cives Romulei, plaudite gloriae:
Insignem meritis dicite Virginem,
Christi dicite martyrem.
_
Haec dum conspicuis orta parentibus
Inter delicias, inter amabiles
Luxus illecebras ditibus affluit
Faustae muneribus domus.
_
Vitae despiciens commoda, dedicat
Se rerum Domino, et munifica manu
Christi pauperibus distribuens opes,
Quaerit praemia coelitum.
_
Non illam crucians ungula, non ferae, 
Non virgae horribili vulnere commovent; 
Hinc lapsi e superum sedibus Angeli 
Coelesti dape recreant. 
_
Quin et deposita saevitie leo 
Se rictu placido projicit ad pedes: 
Te Martina tamen dans gladius neci 
Coeli caetibus inserit.
_ 
Te, thuris redolens ara vaporibus, 
Quae fumat, precibus jugiter invocat, 
Et falsum perimens auspicium, tui 
Delet nominis omine. 
_
A nobis abigas lubrica gaudia 
Tu, qui martyribus dexter ades, Deus 
Une et Trine: tuis da famulis jubar, 
Quo clemens animos beas. 
Amen. 


[Lectio4]
Martina virgo Romana, patre consulari illustri genere nata, teneris adhuc~
annis orbata parentibus christianae pietatis ardore succensa, divitias, quibus~
affluebat, mira in pauperes liberalitate distribuit. Sub Alexandro principe, cum~
deos inanes colere juberetur, immane facinus summa libertate detestatur.~
Quapropter iterum atque iterum affecta verberibus, uncis, lingulis ferreis,~
testarum fragmentis lacerata, acutissimis gladiis membratim concisa, adipe~
ferventi peruncta, demum in amphitheatro damnatur ad bestias a quibus illaesa~
divinitus evadens, in ardentem rogum injecta, incolumis pari beneficio servatur.

[Lectio5]
Ex ejus tortoribus non milli, miraculi novitate correpti, Dei aspirante gratia,~
Christi fidem amplexi, post cruciatus gloriosam martyrii palmam capitis~
abscissione promeruere. Ad eiusdem preces nunc terraemotibus exortis, nunc~
ignibus e coelo tonante delapsis, deorum templa prostrata sunt, et simulacra~
consumpta. Interdum ex vulneribus lac cum sanguine erupit, splendorque~
nitidissimus, ac suavissimus odor e corpore emanavit: interdum sublimis regia in~
sede divinis laudibus una cum coelitibus interesse visa est.

[Lectio6]
Hisce prodigiis, ejusque in primis constantia, acriter permotus judex, caput~
virgini amputari praecepit; qua perempta, auditaque de coelo voce, qua ad~
Superos evocabatur, urbs tota contremuit, ac multi idolorum cultores ad Christi~
fidem conversi sunt. Sacrum Martinae corpus, sedente sancto Urbano primo,~
martyrio affectum, Urbano octavo Pontifice Maximo, in pervetusta eiusdem~
ecclesia, ad Mamertinum carcerem, in Capitolini clivi radicibus, cum sanctorum~
Martyrum Concordii, Epiphanii et sociorum corporibus repertum, eodem loco in~
meliorem formam redacto, atque decentius ornato, magno populi concursu, totius~
Urbis laetitia, solemni ritu ac pompa repositum est.

[Lectio94]
Martína virgo Romána, illústri génere nata, téneris, adhuc annis orbáta paréntibus, ingéntes divítias lárgiter in páuperes distríbuit.  Sub Alexándro príncipe jussa inánibus diis sacrificáre, immáne fácinus destestátur.  Quare divérsis tormentórum genéribus cruciáta, demum in amphitheátro damnátur ad béstias ; a quibus illæsa divínitus evádens, in ardéntem rogum injécta, incólumis páriter servátur.  Nonnúlli ex ejus tortóribus, capti novitáte mirácula, Christi fidem amplecténtes, palmam martyrii adépti sunt.  Précibus Martínæ multa Deus prodígia patrávit, quibus judex ácriter permótus et Vírginis constántiam demirátus, caput eídem amputári præcépit, sedénte sancto Urbáno Papa primo.  Martínæ corpus, Urbáno octávo Pontífice máximo, in vetústa ejúsdem ecclésia ad Mamertínum cárcerem, cum sanctórum Mártyrum Concórdii, Epiphánii et Sociórum corpóribus repértum, eódem loco, decéntius ornáto, totíus Urbis lætítia solémniter repósitum fuit.
&teDeum

[Hymnus Laudes]
v. Tu natale solum protege, tu bonae
Da pacis requiem Christiadum plagis
Armorum strepitus, et fera praelia
In fines age Thracios.
_
Et regum socians agmina sub crucis
Vexillo, Solymas nexibus exime,
Vindixque innocui sanguinis hosticum
Robur funditus erue.
_
Tu nostrum columen, tu decus inclytum,
Nostrarum obsequium respice mentium;
Romae vota libens excipe, quae pio
Te ritu canit, et colit.
_
A nobis abigas lubrica gaudia
Tu, qui Martyribus dexter ades, Deus
Une et Trine: tuis da famulis jubar,
Quo clemens animos beas.
Amen.

[Hymnus Vespera 3]
v. Tu natale solum protege, tu bonae
Da pacis requiem Christiadum plagis
Armorum strepitus, et fera praelia
In fines age Thracios.
_
Et regum socians agmina sub crucis
Vexillo, Solymas nexibus exime,
Vindixque innocui sanguinis hosticum
Robur funditus erue.
_
Tu nostrum columen, tu decus inclytum,
Nostrarum obsequium respice mentium;
Romae vota libens excipe, quae pio
Te ritu canit, et colit.
_
A nobis abigas lubrica gaudia
Tu, qui Martyribus dexter ades, Deus
Une et Trine: tuis da famulis jubar,
Quo clemens animos beas.
Amen.