[Rank]
S. Joannis Papæ et Martyris;;Simplex;;1.1;;vide C2

[Rule]
vide C2;
1 et 2 lectiones

[Lectio2]
Joannes Etruscus, Justino seniore imperatore, rexit Ecclesiam: ad quem profectus est Constantinopolim auxilii causa, quod Theodoricus rex hæreticus divexabat Italiam. Cujus étiam iter Deus miraculis illustravit, Nam, cum ei nobilis vir ad Corinthum, equum, quo ejus uxor mansueto utebatur, itineris causa commodasset, factum est, ut, domino postea remissus equus ita ferox evaderet, ut fremitu et totius corporis agitatione semper deinceps dominam expulerit: tamquam indignaretur mulierem recipere, ex quo sedisset in eo Jesu Christi Vicarius. Quam ob rem illi equum Pontifici donaverunt. Sed illud majus miraculum, quod Constantinopoli, in aditu portæ Aureæ inspectante frequentissimo populo, qui una cum imperatore Pontifici honoris causa occurrerat, cæco lumen restituit. Ad cujus pedes prostratus étiam imperator eum veneratus est.

[Lectio3]
Rebus cum imperatore compositis, in Italiam rediit, statimque epistolam scripsit ad omnes Italiæ episcopos, jubens eos Arianorum ecclesias ad catholicum ritum consecrare, illud subjungens: Quia et nos, quando fuimus Constantinopoli tam pro religione catholica quam pro regis Theodorici causa, quascumque illis in partibus eorum ecclesias reperire potuimus, catholicas eas consecravimus.  Quod iniquissimo animo ferens Theodoricus, dolo accersitum Pontificem Ravennam in carcerem conjecit; ubi, squalore inediaque afflictus, paucis diebus cessit e vita, cum sedisset annos duos, menses novem, dies quatuordecim, ordinatis eo tempore episcopis quindecim. Paulo post moritur Theodoricus: quem quidam eremita, ut scribit sanctus Gregorius, vidit inter Joánnem Pontificem et Symmachum patricium, quem idem occiderat, demergi in ignem Liparitanum; ut videlicet illi, quibus mortem attulerat, tamquam judices essent ejus interitus. Joannis corpus Ravenna Romam portatum est, et in basilica sancti Petri sepultum.
&teDeum