[Rank]
In Nativitate S. Joannis Baptistæ;;Duplex I classis cum Octava communi;;6.5;;

[Rank] (rubrica 1960)
In Nativitate S. Joannis Baptistæ;;Duplex I classis;;6;;

[Rule]
Proper;
9 lectiones
Psalmi Dominica
Antiphonas horas
Psalm5 Vespera=116

[Ant Vespera]
Ipse præíbit * ante illum in spíritu et virtúte Elíæ paráre Dómino plebem perféctam.
Joánnes * est nomen ejus: vinum et síceram non bibet, et multi in nativitáte ejus gaudébunt.
Ex útero senectútis * et stérili Joánnes natus est, præcúrsor Dómini.
Iste puer * magnus coram Dómino: nam et manus ejus cum ipso est.
Nazarǽus * vocábitur puer iste: vinum et síceram non bibet, et omne immúndum non manducábit ex útero matris suæ.

[Capitulum Vespera]
!Isa 49:1
v. Audíte, ínsulæ, et atténdite, pópuli de longe: Dóminus ab útero vocávit me, de ventre matris meæ recordátus est nóminis mei.
$Deo gratias

[Hymnus Vespera]
v. Ut queant laxis resonáre fibris
Mira gestórum fámuli tuórum,
Solve pollúti lábii reátum,
Sancte Joánnes.
_
Núntius celso véniens Olýmpo,
Te patri magnum fore nascitúrum,
Nomen, et vitæ sériem geréndæ
Ordine promit.
_
Ille promíssi dúbius supérni,
Pérdidit promptæ módulos loquélæ;
Sed reformásti génitus perémptæ
Organa vocis.
_
Ventris obstrúso récubans cubíli
Sénseras Regem thálamo manéntem;
Hinc parens nati méritis utérque
Abdita pandit.
_
Sit decus Patri, genitǽque Proli,
Et tibi, compar utriúsque virtus,
Spíritus semper, Deus unus omni
Témporis ævo. 
Amen.

[HymnusM Vespera]
@:Hymnus Vespera:s/Sit decus/Glória/ s/semper/alme/ s/virtus/semper/ s/Témporis ævo/Témpore sæcli/

[Versum 1]
V. Fuit homo missus a Deo.
R. Cui nomen erat Joánnes.

[Ant 1]
Ingrésso * Zacharía templum Dómini, appáruit ei Gábriel Angelus stans a dextris altáris incénsi.

[Oratio]
Deus, qui præséntem diem honorábilem nobis in beáti Joánnis nativitáte fecísti: da pópulis tuis spirituálium grátiam gaudiórum; et ómnium fidélium mentes dírige in viam salútis ætérnæ.
$Per Dominum

[Invit]
Regem Præcursóris Dóminum, * Veníte, adorémus.

[HymnusM Matutinum]
@:Hymnus Matutinum:s/posses/saltem/ s/Crímine linguæ/Flámine posses/ s/durum/hirtum/ s/Sit decus/Glória/ s/semper/alme/ s/virtus/semper/ s/Témporis ævo/Témpore sæcli/

[Hymnus Matutinum]
v. Antra desérti téneris sub annis,
Cívium turmas fúgiens, petísti,
Ne levi posses maculáre vitam
Crímine linguæ.
_
Prǽbuit durum tégumen camélus
Artubus sacris, stróphium bidéntes;
Cui latex haustum, sociáta pastum
Mella locústis.
_
Céteri tantum cecinére Vatum
Corde præságo jubar affutúrum;
Tu quidem mundi scelus auferéntem
Indice prodis.
_
Non fuit vasti spátium per orbis
Sánctior quisquam génitus Joánne,
Qui nefas sæcli méruit lavántem
Tíngere lymphis.
_
Sit decus Patri, genitǽque Proli,
Et tibi, compar utriúsque virtus,
Spíritus semper, Deus unus omni
Témporis ævo. 
Amen.

[Ant Matutinum]
Priúsquam te formárem * in útero, novi te; et ántequam progrederéris, sanctificávi te.;;1
Ad ómnia quæ mittam te, * dicit Dóminus, ibis: ne tímeas, et quæ mandávero tibi, loquéris ad eos.;;2
Ne tímeas * a fácie eórum, quia ego tecum sum, dicit Dóminus.;;3
V. Fuit homo missus a Deo.
R. Cui nomen erat Joánnes.
Misit Dóminus * manum suam, et tétigit os meum, et prophétam in géntibus dedit me Dóminus.;;4
Ecce dedi verba mea * in ore tuo: ecce constítui te super gentes et regna.;;5
Dóminus * ab útero vocávit me, de ventre matris meæ recordátus est nóminis mei.;;8
V. Inter natos mulíerum non surréxit major.
R. Joánne Baptísta.
Pósuit os meum * Dóminus quasi gládium acútum: sub umbra manus suæ protéxit me.;;14
Formans me * ex útero servum sibi Dóminus, dicit: Dedi te in lucem géntium, ut sis salus mea usque ad extrémum terræ.;;20
Reges vidébunt, * et consúrgent príncipes et adorábunt Dóminum Deum tuum, qui elégit te.;;33
V. Elísabeth Zacharíæ magnum virum génuit.
R. Joánnem Baptístam, præcursórem Dómini.

[Lectio1]
Incipit liber Jeremíæ Prophétæ
!Jer 1:1-5
1 Verba Jeremíæ fílii Helcíæ, de sacerdótibus, qui fuérunt in Anathoth, in terra Bénjamin.
2 Quod factum est verbum Dómini ad eum in diébus Josíæ fílii Amon regis Juda, in tertiodécimo anno regni ejus.
3 Et factum est in diébus Jóakim fílii Josíæ regis Juda, usque ad consummatiónem undécimi anni Sedecíæ fílii Josíæ regis Juda, usque ad transmigratiónem Jerúsalem, in mense quinto.
4 Et factum est verbum Dómini ad me, dicens:
5 Priúsquam te formárem in útero, novi te: et ántequam exíres de vulva, sanctificávi te, et prophétam in géntibus dedi te.

[Responsory1]
R. Fuit homo missus a Deo, cui nomen erat Joánnes: 
* Hic venit in testimónium, ut testimónium perhibéret de lúmine, et paráret Dómino plebem perféctam.
V. Erat Joánnes in desérto prǽdicans baptísmum pœniténtiæ.
R. Hic venit in testimónium, ut testimónium perhibéret de lúmine, et paráret Dómino plebem perféctam.

[Lectio2]
!Jer 1:6-10
6 Et dixi, A a a, Dómine Deus: ecce néscio loqui, quia puer ego sum.
7 Et dixit Dóminus ad me: Noli dícere, Puer sum: quóniam ad ómnia, quæ mittam te, ibis: et univérsa, quæcúmque mandávero tibi, loquéris.
8 Ne tímeas a fácie eórum: quia tecum ego sum, ut éruam te, dicit Dóminus. 
9 Et misit Dóminus manum suam, et tétigit os meum: et dixit Dóminus ad me: Ecce dedi verba mea in ore tuo:
10 ecce constítui te hódie super gentes, et super regna, ut evéllas, et déstruas, et dispérdas, et díssipes, et ædífices, et plantes.

[Responsory2]
R. Elísabeth Zacharíæ magnum virum génuit, Joánnem Baptístam, præcursórem Dómini: 
* Qui viam Dómino præparávit in erémo.
V. Fuit homo missus a Deo, cui nomen erat Joánnes.
R. Qui viam Dómino præparávit in erémo.

[Lectio3]
!Jer 1:17-19
17 Tu ergo accínge lumbos tuos, et surge, et lóquere ad eos ómnia quæ ego præcípio tibi. Ne formídes a fácie eórum: nec enim timére te fáciam vultum eórum.
18 Ego quippe dedi te hódie in civitátem munítam, et in colúmnam férream, et in murum ǽreum, super omnem terram, régibus Juda, princípibus ejus, et sacerdótibus, et pópulo terræ.
19 Et bellábunt advérsum te, et non prævalébunt: quia ego tecum sum, ait Dóminus, ut líberem te.

[Responsory3]
R. Priúsquam te formárem in útero, novi te: et ántequam exíres de ventre, sanctificávi te,
* Et prophétam in géntibus dedi te.
V. Vir diléctus a Deo, et homínibus honorátus est.
R. Et prophétam in géntibus dedi te.
&Gloria
R. Et prophétam in géntibus dedi te.

[Lectio4]
Sermo sancti Augustíni Epíscopi
!Sermo 20 de Sanctis
Post illum sacrosánctum Dómini natális diem, nullíus hóminum nativitátem légimus celebrári, nisi solíus beáti Joánnis Baptístæ. In áliis Sanctis et eléctis Dei nóvimus illum diem coli, quo illos, post consummatiónem labórum et devíctum triumphatúmque mundum, in perpétuas æternitátes præsens hæc vita partúriit. In áliis consummáta últimi diéi mérita celebrántur: in hoc étiam prima dies, et ipsa étiam hóminis inítia consecrántur; pro hac absque dúbio causa, quia per hunc Dóminus advéntum suum, ne súbito hómines insperátum non agnóscerent, vóluit esse testátum. Joánnes autem figúra fuit véteris Testaménti, et in se formam prǽtulit legis; et ídeo Joánnes prænuntiávit Salvatórem, sicut lex grátiam præcucúrrit.

[Responsory4]
R. Descéndit Angelus Dómini ad Zacharíam dicens: Accipe púerum in senectúte tua: 
* Et habébit nomen Joánnes Baptísta.
V. Iste puer magnus coram Dómino: nam et manus ejus cum ipso est.
R. Et habébit nomen Joánnes Baptísta.

[Lectio5]
Quod autem nondum natus de secréto matérni úteri prophetávit, et expers lucis jam testis est veritátis; hoc est intellegéndum, quod latens sub velámine et carne lítteræ, et Redemptórem mundo spíritu prædicávit, et nobis Dóminum nostrum de quodam legis útero proclamávit. Ergo quia Judǽi erravérunt a ventre, id est, a lege quæ a Christo grávida erat, erravérunt a ventre, locúti sunt falsa; ídeo hic venit in testimónium, ut testimónium perhibéret de lúmine.

[Responsory5]
R. Hic est præcúrsor diléctus, et lucérna lucens ante Dóminum: 
* Ipse est enim Joánnes, qui viam Dómino præparávit in erémo; sed et Agnum Dei demonstrávit, et illuminávit mentes hóminum.
V. Ipse præíbit ante illum in spíritu et virtúte Elíæ.
R. Ipse est enim Joánnes, qui viam Dómino præparávit in erémo; sed et Agnum Dei demonstrávit, et illuminávit mentes hóminum.

[Lectio6]
Quod autem Joánnes in cárcere constitútus ad Christum discípulos suos órdinat; lex ad Evangélium transmíttit. Quæ lex juxta typum Joánnis, quasi ignorántiæ clausa cárcere, in obscúro et in occúlto jacébat, et Judáica cæcitáte sensus intra lítteram tenebátur inclúsus. De hoc beátus Evangelísta prolóquitur: Ille erat lucérna ardens, id est, Spíritus Sancti igne succénsus, ut mundo ignorántiæ nocte possésso lumen salútis osténderet, et quasi inter densíssimas delictórum ténebras splendidíssimus justítiæ solem lucis suæ rádio demonstráret, et de seípso dicens: Ego vox clamántis in desérto.

[Responsory6]
R. Innuébant patri ejus quem vellet vocári eum: et póstulans pugillárem, scripsit dicens: 
* Joánnes est nomen ejus.
V. Apértum est os Zacharíæ, et prophetávit dicens.
R. Joánnes est nomen ejus.
&Gloria
R. Joánnes est nomen ejus.

[Lectio7]
Léctio sancti Evangélii secúndum Lucam
!Luc 1:57-69
Elísabeth implétum est tempus pariéndi, et péperit fílium. Et audiérunt vicíni et cognáti ejus quia magnificávit Dóminus misericórdiam suam cum illa, et congratulabántur ei. Et réliqua.
_
Homilía sancti Ambrósii Epíscopi
!Liber 2 Comm. in Lucæ cap. 1, ante finem
Péperit fílium Elísabeth, et congratulabántur vicíni. Habet Sanctórum edítio lætítiam plurimórum, quia commúne est bonum; justítia enim commúnis est virtus. Et ídeo in ortu justi futúræ vitæ insígne præmíttitur, et grátia secutúræ virtútis exsultatióne vicinórum præfiguránte signátur. Pulchre autem tempus, quo fuit in útero Prophéta, descríbitur, ne Maríæ præséntia taceátur; sed tempus silétur infántiæ, eo quia infántiæ impediménta nescívit. Et ídeo in Evangélio nihil super eo légimus, nisi ortum ejus, et oráculum, exsultatiónem in útero, vocem in desérto.

[Responsory7]
R. Præcúrsor Dómini venit, de quo ipse testátur:
* Nullus major inter natos mulíerum Joánne Baptísta.
V. Hic est enim prophéta, et plus quam prophéta, de quo Salvátor ait.
R. Nullus major inter natos mulíerum Joánne Baptísta.

[Lectio8]
Neque enim ullam infántiæ sensit ætátem, qui supra natúram, supra ætátem in útero pósitus matris, a mensúra cœpit ætátis plenitúdinis Christi. Mire sanctus Evangelísta præmitténdum putávit, quod plúrimi infántem patris nómine Zacharíam appellándum putáverint; ut advértas matri non nomen alicújus displicuísse degéneris, sed id Sancto infúsum Spíritu, quod ab Angelo ante Zacharíæ fúerat prænuntiátum. Et quidem ille mutus intimáre vocábulum fílii nequívit uxóri; sed per prophetíam Elísabeth dídicit, quod non didícerat a maríto.

[Responsory8]
R. Gábriel Angelus appáruit Zacharíæ dicens: Nascétur tibi fílius, nomen ejus Joánnes vocábitur: 
* Et multi in nativitáte ejus gaudébunt.
V. Erit enim magnus coram Dómino, vinum et síceram non bibet.
R. Et multi in nativitáte ejus gaudébunt.
&Gloria
R. Et multi in nativitáte ejus gaudébunt.

[Lectio9]
Joánnes est, inquit, nomen ejus; hoc est, non nos ei nomen impónimus, qui jam a Deo nomen accépit. Habet vocábulum suum, quod agnóvimus, non quod elégimus. Habent hoc mérita Sanctórum, ut a Deo nomen accípiant. Sic Jacob Israël dícitur, quia Deum vidit. Sic Dóminus noster Jesus nominátus est, ántequam natus; cui non Angelus, sed Pater nomen impósuit. Vides Angelos quæ audíerint, non quæ usurpáverint, nuntiáre. Nec miréris, si nomen múlier, quod non audívit, asséruit; quando Spíritus ei Sanctus, qui Angelo mandáverat, revelávit.
&teDeum

[Ant Laudes]
Elísabeth Zacharíæ * magnum virum génuit, Joánnem Baptístam, præcursórem Dómini.
Innuébant patri ejus * quem vellet vocári eum: et scripsit dicens: Joánnes est nomen ejus.
Joánnes vocábitur * nomen ejus: et in nativitáte ejus multi gaudébunt.
Inter natos mulíerum * non surréxit major Joánne Baptísta.
Tu, puer, * Prophéta Altíssimi vocáberis; præíbis ante Dóminum paráre vias ejus.

[Capitulum Laudes]
@:Capitulum Vespera

[HymnusM Laudes]
@:Hymnus Laudes:s/te fructu cumuláta centum/centéno cumuláta fructu/ s/Néxibus/Te sacer/ s/revélle/repélle:/ s/culpæ sine labe/pulsa livióne/ s/beátos/sacrátos/

[Hymnus Laudes]
v. O nimis felix, meritíque celsi,
Nésciens labem nívei pudóris,
Prǽpotens Martyr, nemorúmque cultor,
Máxime Vatum.
_
Serta ter denis álios corónant
Aucta creméntis, duplicáta quosdam,
Trina te fructu cumuláta centum
Néxibus ornant.
_
Nunc potens nostri méritis opímis
Péctoris duros lápides revélle
Asperum planans iter, et refléxos
Dírige calles.
_
Ut pius mundi Sator et Redémptor
Méntibus culpæ sine labe puris
Rite dignétur véniens beátos
Pónere gressus.
_
Láudibus cives célebrent supérni
Te, Deus simplex paritérque trine,
Súpplices et nos véniam precámur:
Parce redémptis.
Amen.

[Versum 2]
V. Iste puer magnus coram Dómino.
R. Nam et manus ejus cum ipso est.

[Ant 2]
Apértum est * os Zacharíæ, et prophetávit dicens: Benedíctus Deus Israël.

[Lectio Prima]
!Isa 49:7
v. Reges vidébunt, et consúrgent príncipes et adorábunt Dóminum Deum tuum, et Sanctum Israël, qui elégit te.

[Capitulum Tertia]
@:Capitulum Vespera

[Responsory Tertia]
R.br. Fuit homo * Missus a Deo.
R. Fuit homo * Missus a Deo.
V. Cui nomen erat Joánnes.
R. Missus a Deo.
&Gloria
R. Fuit homo * Missus a Deo.
_
V. Inter natos mulíerum non surréxit major.
R. Joánne Baptísta.

[Capitulum Sexta]
!Isa 49:5-6
v. Et nunc, hæc dicit Dóminus formans me ex útero servum sibi: Dedi te in lucem géntium, ut sis salus mea usque ad extrémum terræ.
$Deo gratias

[Responsory Sexta]
R.br. Inter natos mulíerum * Non surréxit major.
R. Inter natos mulíerum * Non surréxit major.
V. Joánne Baptísta.
R. Non surréxit major.
&Gloria
R. Inter natos mulíerum * Non surréxit major.
_
V. Elísabeth Zacharíæ magnum virum génuit.
R. Joánnem Baptístam, præcursórem Dómini.

[Capitulum Nona]
@:Lectio Prima
$Deo gratias

[Responsory Nona]
R.br. Elísabeth Zacharíæ * Magnum virum génuit.
R. Elísabeth Zacharíæ * Magnum virum génuit.
V. Joánnem Baptístam, præcursórem Dómini.
R. Magnum virum génuit.
&Gloria
R. Elísabeth Zacharíæ * Magnum virum génuit.
_
V. Iste puer magnus coram Dómino.
R. Nam et manus ejus cum ipso est.

[Ant Vespera 3]
@:Ant Laudes

[Versum 3]
@:Versum 2

[Ant 3]
Puer * qui natus est nobis, plus quam prophéta est: hic est enim, de quo Salvátor ait: Inter natos mulíerum non surréxit major Joánne Baptísta.

[Octava 1]
!Commemoratio Octavæ S. Joannis Baptístæ
Ant. Ingrésso Zacharía templum Dómini, appáruit ei Gábriel Angelus stans a dextris altáris incénsi.
_
V. Fuit homo missus a Deo.
R. Cui nomen erat Joánnes.
_
$Oremus
v. Deus, qui præséntem diem honorábilem nobis in beáti Joánnis nativitáte fecísti: da pópulis tuis spirituálium grátiam gaudiórum; et ómnium fidélium mentes dírige in viam salútis ætérnæ.
$Per Dominum

[Octava 2]
!Commemoratio Octavæ S. Joannis Baptístæ
Ant. Apértum est os Zacharíæ et prophetávit dicens: Benedíctus Deus Israël.
_
V. Iste puer magnus coram Dómino.
R. Nam et manus ejus cum ipso est.
_
$Oremus
v. Deus, qui præséntem diem honorábilem nobis in beáti Joánnis nativitáte fecísti: da pópulis tuis spirituálium grátiam gaudiórum; et ómnium fidélium mentes dírige in viam salútis ætérnæ.
$Per Dominum