##GRATIARUM ACTIO POST MISSAM
_
!Quilibet Sacerdos, ex concessione Leonis XIII sub die 20 Dec. 1884, lucrari potest Indulgentiam unius anni, si post Missam celebratam, dicto Cantico trium Puerorum et Psalmo 150 cum adnexa Antiphona, Versiculis et Orémus, item ut infra, recitet Orationem S. Thomæ Aquinatis Gratias tibi ago, et Orationem S. Bonaventuræ Transfíge.
Ant. Trium puerórum * cantémus hymnum, quem cantábant Sancti in camíno ignis, benedicéntes Dóminum. (T. P. Allelúja.)
!Quæ Antiphona in Duplicibus tantum duplicatur.
!Canticum trium Puerorum
!Dan. 3, 57-88 et 56 
v. Benedícite, ómnia ópera Dómini, Dómino: * laudáte et superexaltáte eum in sæcula.
v. Benedícite, Angeli Dómini, Dómino: * benedícite, cæli, Dómino.
v. Benedícite, aquæ omnes, quæ super cælos sunt, Dómino: * benedícite, omnes virtútes Dómini, Dómino.
v. Benedícite, sol et luna, Dómino: * benedícite, stellæ cæli, Dómino.
v. Benedícite, omnis imber et ros, Dómino: * benedícite, omnes spíritus Dei, Dómino.
v. Benedícite, ignis et æstus, Dómino: * benedícite, frigus et æstus. Dómino.
v. Benedícite, rores et pruína, Dómino: * benedícite, gelu et frigus, Dómino.
v. Benedícite, glácies et nives, Dómino: * benedícite, noctes et dies, Dómino:
v. Benedícite, lux et ténebræ, Dómino: * benedícite, fúlgura et nubes, Dómino.
v. Benedícat terra Dóminum: * laudet et superexáltet eum in sæcula.
v. Benedícite, montes et colles, Dómino: * benedícite, univérsa germinántia in terra, Dómino.
v. Benedícite, fontes, Dómino: * benedícite, mária et flúmina, Dómino.
v. Benedícite, cete, et ómnia, quæ movéntur in aquis, Dómino:  benedícite, omnes vólucres cæli, Dómino.
v. Benedícite, omnes béstiæ et pécora, Dómino: * benedícite, fílii hóminum, Dómino.
v. Benedícat Israël Dóminum: * laudet et superexáltet eum in sæcula.
v. Benedícite, sacerdótes Dómini, Dómino: * benedícite, servi Dómini, Dómino.
v. Benedícite, spíritus, et ánimæ justórum, Dómino: * benedícite, sancti, et húmiles corde, Dómino.
v. Benedícite, Ananía, Azaría, Mísaël, Dómino: * laudáte et superexaltáte eum in sæcula.
v. Benedicámus Patrem et Fílium cum Sancto Spíritu: * laudémus et superexaltémus eum in sæcula.
v. Benedíctus es, Dómine, in firmaménto cæli: * et laudábilis, et gloriósus, et superexaltátus in sæcula.
! Hic non dicitur Glória Patri, neque Amen,
_
!Psalmus 150 
v. Laudáte Dóminum in sanctis ejus: * laudáte eum in firmaménto virtútis ejus.
v. Laudáte eum in virtútibus ejus: * laudáte eum secúndum multitúdinem magnitúdinis ejus.
v. Laudáte eum in sono tubæ: * laudáte eum in psaltério, et cíthara.
v. Laudáte eum in týmpano, et choro: * laudáte eum in chordis, et órgano.
v. Laudáte eum in cýmbalis benesonántibus: laudáte eum in cýmbalis jubilatiónis: * omnis spíritus laudet Dóminum.
&Gloria
_
Ant. Trium puerórum cantémus hymnum, quem cantábant Sancti in camíno ignis, benedicéntes Dóminum. (Allelúja.)
!Postea Sacerdos dicit:
Kýrie, eléison. Christe, eléison. Kýrie, eléison.
v. Pater noster, qui es in cælis. Sanctificétur nomen tuum. Advéniat regnum tuum. Fiat volúntas tua, sicut in cælo et in terra. Panem nostrum quotidiánum da nobis hódie. Et dimítte nobis débita nostra, sicut et nos dimíttimus debitóribus nostris. Et ne nos indúcas in tentatiónem.
R. Sed líbera nos a malo.
V. Confiteántur tibi, Dómine, ómnia ópera tua.
R. Et Sancti tui benedícant tibi.
V. Exsultábunt Sancti in glória.
R. Lætabúntur in cubílibus suis.
V. Non nobis, Dómine, non nobis.
R. Sed nómini tuo da glóriam.
V. Dómine, exáudi oratiónem meam.
R. Et clamor meus ad te véniat.
V. Dóminus vobíscum.
R. Et cum spíritu tuo.
v. Orémus. 
v. Deus, qui tribus púeris mitigásti flammas ígnium: concéde propítius; ut nos fámulos tuos non exúrat flamma vitiórum. Actiónes nostras, quǽsumus, Dómine, aspirándo prævéni et adjuvándo proséquere: ut cuncta nostra orátio et operátio a te semper incípiat, et per te cœpta finiátur.
v. Da nobis, quǽsumus, Dómine, vitiórum nostrórum flammas exstínguere: qui beáto Lauréntio tribuísti tormentórum suórum incéndia superáre. Per Christum, Dóminum nostrum.
R. Amen.
_
## PRO OPPORTUNITATE SACERDOTIS 
#Oratio S. Thomæ Aquinatis
v. Grátias tibi ago, Dómine sancte, Pater omnípotens, ætérne Deus, qui me peccatórem, indígnum fámulum tuum, nullis meis méritis, sed sola dignatióne misericórdiæ tuæ satiáre dignátus es pretióso Córpore et Sánguine Fílii tui, Dómini nostri Jesu Christi. Et precor, ut hæc sancta commúnio non sit mihi reátus ad pœnam, sed intercéssio salutáris ad véniam. Sit mihi armatúra fídei et scutum bonæ voluntátis. Sit vitiórum meórum evacuátio, concupiscéntiæ et libídinis exterminátio, caritátis et patiéntiæ, humilitátis et obœdiéntiæ, omniúmque virtútum augmentátio: contra insídias inimicórum ómnium, tam visibílium quam invisibílium, firma defénsio: mótuum meórum, tam carnálium quam spiritálium, perfécta quietátio: in te uno ac vero Deo firma adhǽsio; atque finis mei felix consummátio. Et precor te, ut ad illud ineffábile convívium me peccatórem perdúcere dignéris, ubi tu cum Fílio tuo et Spíritu Sancto Sanctis tuis es lux vera, satíetas plena, gáudium sempitérnum, jucúnditas consummáta et felícitas perfécta. Per eúndem Christum, Dóminum nostrum. Amen.
_
#Oratio S. Bonaventuræ 
v. Transfíge, dulcíssime Dómine Jesu, medúllas et víscera ánimæ meæ suavíssimo ac salubérrimo amóris tui vúlnere, vera serenáque et apostólica sanctíssima caritáte, ut lángueat et liquefíat ánima mea solo semper amóre et desidério tui; te concupíscat et defíciat in átria tua, cúpiat dissólvi et esse tecum. Da, ut ánima mea te esúriat, panem Angelórum, refectiónem animárum sanctárum, panem nostrum  cotidiánum, supersubstantiálem, habéntem omnem dulcédinem et sapórem et omne delectaméntum suavitátis. Te, in quem desíderant Angeli prospícere, semper esúriat et comédat cor meum, et dulcédine sapóris tui repleántur víscera ánimæ meæ; te semper sítiat fontem vitæ, fontem sapiéntiæ et sciéntiæ, fontem ætérni lúminis, torréntem voluptátis, ubertátem domus Dei. Te semper ámbiat, te quærat, te invéniat, ad te tendat, ad te pervéniat, te meditétur, te loquátur, et ómnia operétur in laudem et glóriam nóminis tui, cum humilitáte et discretióne, cum dilectióne et delectatióne, cum facilitáte et afféctu, cum perseverántia usque in finem; ut tu sis solus semper spes mea, tota fidúcia mea, divítiæ meæ, delectátio mea, jucúnditas mea, gáudium meum, quies et tranquíllitas mea, pax mea, suávitas mea, odor meus, dulcédo mea, cibus meus, reféctio mea, refúgium meum, auxílium meum, sapiéntia mea, portio mea, posséssio mea, thesáurus meus, in quo fixa et firma et immobíliter semper sit radicáta mens mea et cor meum. Amen.
_
#Rhythmus S. Thomæ Aquinatis
!Indulgentia 100 dierum semel in die Leo PP. XIII, 20 Dec. 1884 
v. Adóro te devóte, latens Déitas, 
Quæ sub his figúris vere látitas: 
Tibi se cor meum totum súbjicit, 
Quia, te contémplans, totum déficit.
_
Visus, tactus, gustus in te fállitur,
Sed audítu solo tuto créditur:
Credo, quidquid dixit Dei Fílius,
Nil hoc verbo Veritátis vérius.
_
In Cruce latébat sola Déitas,
At hic latet simul et humánitas;
Ambo tamen credens atque cónfitens,
Peto, quod petívit latro pænitens.
_
Plagas, sicut Thomas, non intúeor,
Deum tamen meum te confíteor:
Fac me tibi semper magis crédere,
In te spem habére, te dilígere.
_
O memoriále mortis Dómini,
Panis vivus, vitam præstans hómini,
Præsta meæ menti de te vívere,
Et te illi semper dulce sápere.
_
Pie pellicáne, Jesu Dómine,
Me immúndum munda tuo Sánguine,
Cujus una stilla salvum fácere
Totum mundum quit ab omni scélere.
_
Jesu, quem velátum nunc aspício,
Oro, fiat illud, quod tam sítio:
Ut, te reveláta cernens fácie,
Visu sim beátus tuæ glóriæ.
Amen.