Quarto Idus Januárii
_
In Thebáide natális beáti Pauli, primi Eremítæ, Confessóris, qui, a sextodécimo ætátis suæ anno usque ad centésimum décimum tértium, solus in erémo permánsit; cujus ánimam, inter Apostolórum et Prophetárum choros, ad cælum ferri ab Angelis sanctus Antónius vidit. Ejus autem festívitas décimo octávo Kaléndas Februárii celebrátur.
In Cypro beáti Nicánoris, qui fuit unus de septem primis Diáconis; atque, grátia fídei et virtúte admirándus, gloriosíssime coronátus est.
Romæ sancti Agathónis Papæ, qui, sanctitáte et doctrína conspícuus, quiévit in pace.
Bitúricis, in Aquitánia, sancti Willhélmi, Epíscopi et Confessóris, signis et virtútibus clari; quem Honórius Papa Tértius in Sanctórum cánonem adscrípsit.
Medioláni sancti Joánnis Boni, Epíscopi et Confessóris.
Constantinópoli sancti Marciáni Presbýteri.
In monastério Cuxanénsi, in Gállia, natális sancti Petri Urséoli Confessóris, qui, ántea Venetiárum Dux et deínde Monáchus ex Ordine sancti Benedícti, pietáte et virtútibus cláruit.
Arétii, in Túscia, Beáti Gregórii Décimi, civis Placentíni, qui, ex Archidiácono Leodiénsi Summus Póntifex renuntiátus, Concílium Lugdunénse secúndum celebrávit, Græcísque ad unitátem fídei recéptis, compósitis Christianórum dissídiis, Terræ Sanctæ recuperatióne institúta, de universáli Ecclésia, quam sanctíssime gubernávit, óptime méritus est.