Décimo Kaléndas Februárii
_
Sancti Raymúndi de Péñafort, ex Ordine Prædicatórum, Confessóris, cujus dies natális octávo Idus Januárii recólitur.
Romæ sanctæ Emerentiánæ, Vírginis et Mártyris; quæ adhuc catechúmena, dum oráret ad sepúlcrum sanctæ Agnétis, cujus fúerat collactánea, a Gentílibus lapidáta est.
Philíppis, in Macedónia, sancti Pármenæ, qui fuit unus de septem primis Diáconis. Hic, tráditus grátiæ Dei, injúnctum sibi a frátribus offícium prædicatiónis plena fide consúmmans, martýrii glóriam, sub Trajáno, est adéptus.
Ancýræ, in Galátia, sancti Cleméntis Epíscopi, qui, sǽpius cruciátus, tandem, sub Diocletiáno Imperatóre, martýrium consummávit.
Ibídem sancti Agathángeli, qui eódem die, sub Lúcio Prǽside, passus est.
Cæsaréæ, in Mauritánia, sanctórum Mártyrum Severiáni et Aquilæ uxóris, ígnibus combustórum.
Apud Antínoum, Ægýpti urbem, sancti Asclæ Mártyris, qui, post divérsa torménta, pretiósam Deo ánimam, in flumen præcipitátus, réddidit.
Alexandríæ sancti Joánnis Eleemosynárii, ejúsdem urbis Epíscopi, misericórdia in páuperes celebérrimi.
Toléti, in Hispánia, sancti Ildefónsi Epíscopi, qui, ob singulárem vitæ integritátem, susceptámque fídei defensiónem advérsus hæréticos, sanctíssimæ Dei Genitrícis virginitátem impugnántes, ab eádem Vírgine María donátus est candidíssima veste ac demum, sanctitáte célebris, in cælum vocátus.
In Província Valériæ sancti Martýrii Mónachi, cujus méminit beátus Gregórius Papa.