Quinto Nonas Mártii
_
Cæsaréæ, in Palæstína, sanctórum Mártyrum Maríni mílitis, et Astérii Senatóris, in persecutióne Valeriáni. Horum prior, cum accusátus esset a commilitónibus ut Christiánus, et, interrogátus a Júdice, se Christiánum esse voce claríssima testarétur, martýrii corónam abscissióne cápitis accépit; cumque Astérius corpus Mártyris, cápite truncátum, subjéctis húmeris et substráta veste, qua induebátur, excíperet, honórem quem Mártyri détulit, contínuo et ipse Martyr accépit.
Calagúrri, in Hispánia, natális sanctórum Mártyrum Hemitérii et Cheledónii fratrum, qui, cum apud Legiónem, Gallǽciæ urbem, in castris militárent, ambo, exsurgénte persecutiónis procélla, pro confessióne nóminis Christi, Calagúrrim usque profécti, ibi, plúribus torméntis afflícti, martýrio coronáti sunt.
Eódem die pássio sanctórum Felícis, Lucíoli, Fortunáti, Márciæ et Sociórum.
Item sanctórum mílitum Cleoníci, Eutrópii et Basilísci, qui, in persecutióne Maximiáni, sub Asclepíade Prǽside, crucis supplício felíciter triumphárunt
Bríxiæ sancti Titiáni, Epíscopi et Confessóris.
Bambérgæ sanctæ Cunegúndis Augústæ, quæ, sancto Henríco Primo, Romanórum Imperatóri, nupta, perpétuam virginitátem, ipso annuénte, servávit; ac, bonórum óperum méritis cumuláta, sancto fine quiévit, et post óbitum miráculis cláruit.