Octávo Idus Mártii
_
Granátæ, in Hispánia, sancti Joánnis de Deo Confessóris, qui Ordinis Fratrum Hospitalitátis infirmórum fuit Institútor, ac misericórdia in páuperes et sui despéctu éxstitit insígnis; quem Leo Décimus tértius, Póntifex Máximus, cæléstem ómnium hospitálium et infirmórum Patrónum renuntiavit.
Nicomedíæ sancti Quinctílis, Epíscopi et Mártyris.
In Africa sanctórum Mártyrum Cyrílli Epíscopi, Rogáti, Felícis, item Rogáti, Beátæ, Heréniæ, Felicitátis, Urbáni, Silváni et Mamílli.
Apud Antínoum, Ægýpti urbem, natális sanctórum Mártyrum Apollónii Diáconi, et Philémonis; qui, tenti et ad Júdicem addúcti, et, cum sacrificáre idólis constánter renuíssent, ambo, perforátis calcáneis, per civitátem horribíliter tracti, ac novíssime, gládio cæsi, martýrium complevérunt.
Ibídem pássio sanctórum Ariáni Prǽsidis, Theótici et aliórum trium, quos Judex submérsos in mare necávit, sed delphinórum obséquio córpora eórum ad littus deláta sunt.
Carthágine sancti Póntii, qui fuit Diáconus beáti Cypriáni Epíscopi, et, usque ad diem mortis illíus sústinens cum ipso exsílium, vitæ et passiónis ejus egrégium volúmen relíquit, atque, in suis passiónibus Dóminum semper gloríficans, corónam vitæ proméruit.
Toléti, in Hispánia, deposítio beáti Juliáni, Epíscopi et Confessóris, sanctitáte et doctrína celebérrimi.
In Anglia sancti Felícis Epíscopi, qui orientáles Anglos ad fidem convértit.