Quarto Kaléndas Júnii
_
Sanctæ Maríæ-Magdalénæ de Pazzis, ex Ordine Carmelitárum, Vírginis, cujus dies natális octávo Kaléndas Júnii recensétur. 
Romæ, via Aurélia, natális sancti Restitúti Mártyris. 
Apud Icónium, in Lycaónia, pássio sanctórum Conónis, et fílii annórum duódecim, qui, sub Aureliáno Imperatóre, cratículæ, prunis suppósitis et óleo superinfúso candéntis, suspensiónis in equúleo atque ignis pœnam constánter passi, ad extrémum, málleo ligneo mánibus eórum contrítis, spíritum emisérunt.
In agro Tridentíno natális sanctórum Mártyrum Sisínii, Martýrii et Alexándri; qui, témpore Honórii Imperatóris, in Anáuniæ pártibus (ut scribit in vita sancti Ambrósii Paulínus), persequéntibus Gentílibus, martýrii corónam adépti sunt.
Cameríni pássio sanctórum mille quingentórum et vigínti quinque Mártyrum.
Cæsaréæ Philíppi sanctárum Mártyrum Theodósiæ, quæ sancti Procópii Mártyris éxstitit mater, et aliárum duódecim nobílium matronárum; quæ, in persecutióne Diocletiáni, cápitis obtruncatióne consummátæ sunt.
Tréviris beáti Maximíni, Epíscopi et Confessóris; a quo sanctus Athanásius Epíscopus, ob persecutiónem Arianórum éxsulans, honorífice suscéptus fuit.
Verónæ sancti Máximi Epíscopi.
Arcáni, in Látio, sancti Eleuthérii Confessóris.