Quinto Nonas Júlii
_
Romæ natális sancti Leónis Secúndi, Papæ et Confessóris, qui primo sui Pontificátus anno, plenus méritis, migrávit in cælum. 
Clúsii, in Etrúria, sanctórum Mártyrum Irenǽi Diáconi, et Mustíolæ matrónæ; qui sub Aureliáno Imperatóre, divérsis atrocibúsque supplíciis cruciáti, corónam martýrii meruérunt.
Alexandríæ sanctórum Mártyrum Tryphónis et aliórum duódecim.
Constantinópoli sanctórum Eulógii et Sociórum Mártyrum.
Cæsaréæ, in Cappadócia, sancti Hyacínthi, qui Trajáni Imperatóris cubiculárius fuit; et, accusátus quod Christiánus esset, plagis várie afflíctus est, atque, in cárcerem trusus, ibi fame consúmptus exspirávit.
Eódem die sanctórum Mártyrum Marci et Muciáni, qui pro Christo sunt gládio cæsi. Hos cum puer párvulus, ne immolárent idólis, alta voce monéret, verbéribus jussus est cædi; cumque veheméntius Christum confiterétur, tandem, una cum quodam Paulo, Mártyres exhortánte, necátus est.
Laodicéæ, in Sýria, sancti Anatólii Epíscopi, qui non solum religiósis viris, sed et philosóphis admiránda scripta relíquit.
Altíni, in Venetórum fínibus, sancti Heliodóri Epíscopi, doctrína et sanctitáte insígnis.
Ravénnæ sancti Dathi, Epíscopi et Confessóris.
Edéssæ, in Mesopotámia, Translátio sancti Thomæ Apóstoli ex India; cujus relíquiæ Ortónam, apud Frentános, póstea translátæ sunt.