Octávo Idus Júlii
_
Sanctæ Elísabeth Víduæ, Lusitanórum Regínæ, quæ ad regnum cæléste quarto Nonas hujus mensis transívit.
In Asia minóre sanctórum Aquilæ et Priscíllæ uxóris, de quibus in Actibus Apostolórum scríbitur.
Herbípoli, in Germánia, sancti Chiliáni Epíscopi, qui, a Románo Pontífice ad prædicándum Evangélium missus, ibi, cum multos ad Christum perduxísset, una cum Sóciis Colománno Presbýtero, et Totnáno Diácono, trucidátus est.
In Portu Románo sanctórum quinquagínta mílitum Mártyrum, qui, in sanctæ Bonósæ confessióne ad fidem addúcti, et a beáto Felíce Papa Primo baptizáti, in Aureliáni Imperatóris persecutióne occísi sunt.
Cæsaréæ, in Palæstína, sancti Procópii Mártyris, qui, sub Diocletiáno Imperatóre, a Scythópoli ductus Cæsaréam, illic, ad primam responsiónum ejus confidéntiam, a Júdice Fabiáno est cápite cæsus.
Constantinópoli pássio sanctórum Monachórum Abrahamitárum, qui ob cultum sanctárum Imáginum, resisténtes Theóphilo Imperatóri, martýrium consummárunt.
Spinæ Lambérti, in Æmília, sancti Hadriáni Papæ Tértii, stúdio conciliándi Románæ Ecclésias Orientáles insígnis, ac miráculis clari; cujus corpus in monastérium Nonantulénse fuit delátum, et in æde sancti Silvéstri honorífice cónditum.
Tréviris sancti Auspícii, Epíscopi et Confessóris.
Romæ beáti Eugénii Papæ Tértii, qui, postquam cœnóbium sanctórum Vincéntii et Anastásii ad Aquas Sálvias magna sanctimóniæ ac prudéntiæ laude rexísset, Ecclésiam univérsam, Póntifex Máximus renuntiátus, sanctíssime gubernávit. Cultum autem, ab immemorábili témpore ipsi exhíbitum, Pius Papa Nonus ratum hábuit et confirmávit.